Алматы қалалық ПД Криминалдық полиция басқармасының бастығы Қуатбек Науатовтың мәліметінше, ұрылар Mazda автокөліктерін ұрлауға маманданған.
Қазіргі уақытта анықталғандай, 23 жастағы Қарақалпақстан тумасы мен оның 22 және 28 жастағы екі сыбайласының мойнында көлік ұрлау бойынша 9 дерек бар.
«Көлік ұрлағандарды әшкерелеу және ұстау іс-шарасын патрульдік полиция полкінің қызметкерлерімен бірлесіп жүргіздік. Жедел-іздестіру іс-шаралары барысында күдіктілер 23 жастағы Я. есімді азамат, оның сыбайласы 22 жастағы туған К. есімді азамат және ұрланған көліктерді сатып алушы 28 жастағы Д. есімді азамат ұсталды. Олар бұрын сотталмаған», – деді Қуатбек Науатов.
Қылмыскерлер өз кінәларын бірден мойындады. Тергеу іс-шаралары барысында 4 көлік табылды. Олар айғақты зат ретінде қылмыстық іске қосылды, ал қалғандары қайта сатылған немесе қосалқы бөлшектерге бөлшектелген.
Ұрланған көліктердің тұрған жерін анықтау бойынша іздестіру шаралары жүргізіліп жатыр. Тергеу барысында қылмыскерлер қамауға алынды.
