Біріккен Араб Әмірліктерінде өткен мектеп оқушылары арасындағы «Dubai Oner Kerueni» халықаралық байқауында Жамбыл ауданы, Ұзынағаш ауылындағы №1 мектеп-лицейдің 7-сынып оқушысы Исағали Сезім ұлттық нақыштағы авторлық қолөнер туындыларымен бас жүлдені жеңіп алды
Жас шебер қазылар алқасына үш бірдей ерекше жұмысын ұсынған:
- «Қазақ даласы» – қой жүнін фетрге инемен тескілеу әдісі арқылы жасалған көркем туынды;
- Қазақтың ою-өрнектері мен қарлығаш бейнесі – фетрге жүннен бедерленген ұлттық композиция;
- Киіз үй макеті – ағаштан жасалған, дәстүрлі стильде безендірілген шағын мүсін.
Исағали Сезімнің айтуынша, оның басты мақсаты — қазақ мәдениеті мен ұлттық қолөнерін шетелдік көрерменге таныту.
«Дубайда өткен халықаралық байқауға қатысу мен үшін үлкен жетістік. Алғашында толқығаным рас, бірақ жақсы дайындықтың арқасында сенімділік пайда болды. Бас жүлде аталған сәт өмірімдегі ең ұмытылмас кезеңдердің бірі. Байқауға ұсынған қолөнер бұйымдарым қазақтың ұлттық ою-өрнектеріне негізделген. Өз мәдениетіміз бен тарихымызды шетелде таныстыру маған үлкен шабыт берді», — дейді жас шебер.
Сезім — ерекше білім беруді қажет ететін оқушы. Тірек-қимыл аппаратының бұзылыстары мен сөйлеу тілінің даму ерекшеліктеріне қарамастан, ол шығармашылыққа деген құлшынысын жоғалтпай, табанды еңбегі мен талантын дәлелдеп, биік нәтижеге жетті. Оның бұл табандылығы көптеген дарынды балаға үлгі болып отыр.
Ұйымдастырушылардың айтуынша, халықаралық байқауға түрлі елдерден келген ондаған жас дарын қатысқан. Солардың ішінен Сезімнің ұлттық өрнектерге негізделген жұмыстары ерекше бағаланып, бас жүлдеге лайық деп танылған.
