Кездесуге мәслихат депутаттары, қоғамдық ұйымдар мен бұқаралық ақпарат құралдарының өкілдері, сондай-ақ құқық қорғау және жергілікті атқарушы органдардың басшылары және жергілікті тұрғындар қатысты.
Жиынның негізгі мақсаты – тұрғындарды толғандыратын әлеуметтік мәселелерді талқылап, оларды шешу жолдарын нақты айқындау.
Алдымен Балқаш ауданының әкімі Азат Үкітайұлы Құтпанбетов өткен кезеңде атқарылған жұмыстар мен алдағы жоспарлар туралы есеп берді.
Келесі кезекте облыс әкімі Марат Елеусізұлы Сұлтанғазиевтің «Алматы облысының әлеуметтік-экономикалық дамуы туралы» баяндамасы тыңдалды.
Кездесу барысында тұрғындар тарапынан түрлі әлеуметтік және инфрақұрылымдық сұрақтар көтеріліп, әкім нақты жауаптар мен түсіндірмелер берді. Кездесу барысында тұрғындар ауыл инфрақұрылымы, жол, газ және әлеуметтік нысандарға қатысты бірқатар сұрақтар қойды.
Бірлік ауылының тұрғыны Жандәулет Ахын ауылдағы мәдениет үйінің ескіргенін айтып, оған күрделі жөндеу қажет екенін жеткізді.
Бұл сұраққа жауап берген облыс әкімі:
«Бірлік ауылдық мәдениет үйін жөндеуге жобалық-сметалық құжаттама дайындау үшін 19 млн теңге қаражат бөлу 2026 жылға арналған бюджетті нақтылау кезінде қарастырылады», – деді.
Балатопар ауылының тұрғыны Нұрлан Қашқынбаев ескі амбулаторияның жағдайына алаңдаушылық білдіріп, жаңа медициналық пункт салу туралы өтініш айтты.
Әкім бұл мәселенің шешімі бар екенін атап өтті:
«Қазіргі амбулатория қамыс-каркастан салынған, сондықтан жөндеу тиімсіз. Оның орнына блок-модульдік кешен орнату 2026 жылға жоспарланған. Барлық инженерлік-коммуникациялық желілер қамтамасыз етіледі», – деді ол.
Бура ауылының тұрғыны Қайрат Дүбеков ауылдарға газ тарту жайында сұрады.
Оның айтуынша, көрші Ақжар мен Береке ауылдарына газ желісі тартылып жатыр, ал Бура ауылына қашан кезек келетіні қызықтырады.
«Бура және Ақкөл ауылдарының газ желісін тартуға арналған жобалық-сметалық құжаттама дайын, сараптамадан оң қорытынды алынған. Газ тарту жұмыстары 2026 жылы басталады. Бураға – 381 млн теңге, Ақкөлге – 1,2 млрд теңге қаражат қажет», – деді Марат Сұлтанғазиев.
Бекзат Жұмабеков М. Сеңгірбаев және Қарағаш орта мектептерінде жүргізіліп жатқан күрделі жөндеу жұмыстары кезінде олардың материалдық-техникалық базасын да жаңарту қажеттігін айтты.
Бұл ұсынысқа әкім: «Қарағаш мектебінің жөндеу жұмыстары желтоқсанда аяқталып, 20 млн теңгеге жабдықтар жаңартылады. Ал М. Сеңгірбаев мектебі – өтпелі нысан, оның толық жаңартылуы 2026 жылға жоспарланған», – деп жауап берді.
Ерлан Данкебаев Топар–Қаншеңгел бағытындағы жолдың сапасы нашар екенін айтып, жөндеу қажет екенін жеткізді.
Әкім бұл бағыттағы жұмыстардың да бақылауда екенін айтты. Оның сөзінше, Топар–Қаншеңгел облыстық маңызы бар жолының 240–265 км аралығында орташа жөндеу жүргізілді. Қалған бөліктердегі шұңқырларды жамау жұмыстары қараша айының соңына дейін аяқталады.
Әкім тұрғындар көтерген мәселелердің әрқайсысы бақылауға алынатынын және арнайы іс-қимыл жоспары жасалатынын атап өтті. Аталған жоспардың орындалу барысы ресми интернет-ресурстарда және «Электрондық үкімет» веб-порталында тоқсан сайын жарияланып отырады.
«Біздің мақсат – халықтың өмір сүру сапасын арттыру, әлеуметтік мәселелерді дер кезінде шешу. Әр ұсыныс пен сұрақ нақты нәтижеге бағытталады», – деді облыс әкімі Марат Сұлтанғазиев.
Кездесу қорытындысы бойынша барлық ұсыныстар жинақталып, бақылау тізіміне енгізілді. Балқаш ауданының тұрғындарымен осындай ашық форматтағы кездесулер алдағы уақытта да жалғасады.
