Жезқазған қаласында оны Ұлытау облысының әкімі Берік Әбдіғали мен Қарағанды облысының әкімі Жеңіс Қасымбек қарсы алды. Президент Жезқазған қаласы мен Ұлытау облысының қазіргі жағдайы мен даму перспективалары туралы баяндамаларды тыңдады.
Хабарланғандай, Мемлекет басшысы Ұлттық құрылтай құру туралы Жарлыққа қол қойды. Құжатқа сәйкес, құрылтай – бұл Қазақстан Республикасы Президентінің жанындағы консультативтік-кеңесші орган. Оның негізгі мақсаты-қоғамдық шоғырлануды одан әрі дамыту бойынша идеялар мен қадамдар жасау.
Құрылтайдың негізгі міндеттеріне мыналар кіреді:
жалпыұлттық құндылықтарды ілгерілету және нығайту,
жұртшылық, саяси партиялар, үкіметтік емес сектор және мемлекеттік органдар өкілдері арасында сындарлы диалогты қамтамасыз ету.
Оның құрамы белгілі мемлекет және қоғам қайраткерлерінің, саяси партиялардың, үкіметтік емес сектордың, бизнес-қауымдастықтардың, сарапшылар қоғамдастығының және облыстардың, республикалық маңызы бар қалалардың, астананың Қоғамдық кеңестерінің өкілдерінен тұратын болады. Мерзімді түрде Ұлттық құрылтай құрамы жаңартылады.
Ұлттық құрылтайды Қазақстан Республикасының Президенті басқарады.
Ұлттық құрылтайдың ұсынымдарын алған мемлекеттік органдар, сондай-ақ қоғамдық бірлестіктер оларды қарауға және қабылданған шаралар туралы хабардар етуге тиіс болады.
