Алматы облысының туризм басқармасының басшысы Қуанышбек Мирамбекұлы мен «Экстремалды Атлетика» ҚБ басқарушы директоры Вадим Винокуров шараға қатысушылардың саны биыл айтарлықтай өскенін айтады.
Жобаның басты мақсаты — бұқаралық спортты дамыту және салауатты өмір салтын насихаттау. Одан бөлек, ішкі және сыртқы туризмді дамыту.
Іле жағалауындағы үш күндік ашық аспан астындағы фестивальге шамамен 3 мыңнан астам атлет қатысады. Қазірге дейін қатысуға 1500 атлет өтінім тастаған. Олар 1, 3, 7, 25, 50 және 100 км шақырымдық қашықтыққа жүгірумен қатар, скандинавиялық жүріс және веложарыс пен каникросс бойынша да сайысқа түседі.
«Фестиваль биыл 10-шы мәрте ұйымдастырылып отыр. Бұл – біз үшін мерейтой. Жыл сайын біздің фестиваль ерекшелене түсуде. Осыған орай, азаматтардың қызығушылығы артуда», — деді Вадим Винокуров.
Ол базалық лагерь Тамғалы-Тас көркем жартасты шатқалында орналасқанын айтты. Спорт сүйер қауым, марафонға қатыса отырып, көркем табиғатқа тамсана алады.
«Марафон еліміздің спорт тарихындағы ерекше орны бар шара. Халықаралық дәрежедегі сертификаты бар осы жоба көркі көз тартатын, келбеті келісті өңірімізде 2015 жылдан бері өткізіліп келеді. Осы 10 жыл көлемінде марафонға кемінде 50 елдің мыңнан астам азаматы қатысты. Бұл дегеніміз ішкі туризм дамуына үлкен септігін тигізеді», — деді Қуанышбек Мирамбекұлы.
Жарысқа тіркелу 26 сәуір күні, сағат 12:00-ге дейін немесе қатысушылар санының шегіне жеткенге дейін ашық. Шара бойынша толықтай ақпартты athletex.kz сайтынан оқи аласыздар.
