Облыстық мәліметке сәйкес, биыл өңірде 27 360 жас азамат жұмыспен қамтылды. Оның ішінде 14 094 жас жеке бастамалар аясында еңбек етіп жүрсе, 6 927 азамат enbek.kz порталы арқылы тұрақты жұмысқа орналасқан. Ал жұмыспен қамтудың белсенді шараларына 3 852 жас тартылып, жастар тәжірибесі, қоғамдық жұмыстар, әлеуметтік жұмыс орындары, алғашқы жұмыс орны және ұрпақтар келісімшарты бағдарламалары іске асырылды.
Сонымен қатар, өңірде NEET санатындағы жастар саны айтарлықтай қысқарды. Егер 2024 жылы бұл көрсеткіш 45 994 адам болса, 2025 жылы 27 074 адамға дейін төмендеген. Яғни, бір жылда 18 920 жасқа азайған. Қазіргі таңда Алматы облысында 35 жасқа дейінгі жастар саны 432 мыңнан асады, бұл өңір халқының шамамен 30 пайызын құрайды.
Жастардың кәсіпкерлік әлеуетін арттыру мақсатында «Бизнес бастау» жобасы аясында 910 жас оқудан өтті. Өз кәсібін ашуға ниетті 91 жас азаматқа 400 АЕК немесе шамамен 1,5 миллион теңге көлемінде мемлекеттік грант берілді. Бұдан бөлек, 254 жұмыссыз жас қысқа мерзімді кәсіптік оқыту курстарына жолданды.
2025 жылы өңірлік «Тәуелсіздік ұрпақтары» гранты аясында 10 жасқа 10 миллион теңге табысталды. Сондай-ақ Алматы облысы әкімінің «Заңғар» жастар сыйлығымен 10 жас азамат 5 миллион теңгеден марапатталды. Ауыл жастары және олармен жұмыс істейтін мамандарды қолдауға арналған «Umtylys» байқауы да ұйымдастырылды.
Жастарды маусымдық жұмыспен қамтуда «Жасыл ел» жобасы маңызды рөл атқарды. Аталған жоба аясында 1000 жас еңбекке тартылып, оның 800-і ауыл жастары болды. 2026 жылы тағы 1 мың жас азаматты маусымдық жұмыспен қамту жоспарланып отыр. Сонымен қатар, жастар еңбек жасақтарын құрылыс, аграрлық және инженерлік-техникалық бағыттар арқылы жаңғырту көзделген.
Инфрақұрылымды дамыту бағытында Балқаш, Кеген, Райымбек және Қарасай аудандарында төрт жаңа жастар орталығы пайдалануға берілді. Қонаев қаласында жастарға арналған коворкинг орталығы ашылды. Алдағы жылы Талғар, Жамбыл, Еңбекшіқазақ және Ұйғыр аудандарында тағы төрт жастар орталығын іске қосу жоспарланып отыр.
Волонтерлік қызметті дамыту мақсатында volunteers05.kz электронды платформасы іске қосылып, 3 мың белсенді волонтерден тұратын база қалыптастырылды. Республикалық «Игі істер марафоны» аясында Алматы облысы «Ең мейірімді аймақ» номинациясын жеңіп алды. Сонымен қатар, «Жыл волонтері» халықаралық сыйлығымен өңірдің 5 волонтерлік ұйымы марапатталды.
Өңірде жүзеге асқан бұл бастамалар жастардың әлеуетін арттыруға, олардың әлеуметтік белсенділігін күшейтуге және тұрақты дамуына серпін беріп отыр.
