«Аудан жеміс-жидек дақылдары мен жүзім өсіру бойынша облыс көлемінде 2-орынды алады, олардың алқабы 4 мың гектарға немесе облыс көлемінің 22,2% жеткен. Оның ішінде аудан өрік өсіру бойынша облыста 1-орында тұр. Алайда, ауа-райының қолайсыздығына байланысты бақтардағы жеміс-жидек дақылдарының 98%-ы үсікке ұрынуына байланысты өнім болмайды деп күтіліп отыр», — деді Марат Сұлтанғазиев.
Өңір басшысы аталған мәселеге байланысты әкімдік тарапынан аграршылардың шығындарын өтеу үшін ауыл шаруашылығы саласында сақтандыру институтын дамыту қажет екенін атап өтті. Сондай-ақ Марат Сұлтанғазиев инвесторларды тарта отырып, жеміс-жидек өңдейтін өндірістер ашуды жолға қою қажеттігін де сөз етті.
Айта кетейік, ауданда жемістерді өңдеумен ірі өндіруші – «Шонжы Агро» айналысады, ол 500 гектар жерде өрік, шабдалы, қара өрік және шие өсіреді.
