Тілшілер барған ең бірінші ауыл облыс орталығы – Қонаев қаласынан 30 шақырым жерде орналасқан Шеңгелді ауылы.
Ең алдымен журналистер Талдықорған-Алматы трассасының жиегінде пияз сатып тұрған шаруалармен сөйлесті. Олардың айтуынша, биыл жуаны саудалау қиын болып тұр. Себебі былтыр «Алтын орда» базарына көтерме бағамен пияз өткізген шаруалардың алдын қордайлықтар орап алған.
«Қордай шаруаларының саудасы пияз бағасының төмендеуіне әкелді. Еккен еңбек, төккен тердің пайдасын көре алмай отырмыз. Амал жоқ, жол бойында пияз сатып жатырмыз», — деді есімін жасыруды сұраған тұрғын.
Суармалы судың жоғары тарифі мен оның жетіспеушілігі, сорғы стансаларының тозуы – бұл да мәселе. Дегенмен көкөніс қоймасының аздығы, өнім өткізудің азабы да кезек күттірмей шешілуі қажет проблема.
Содан соң тілшілер ауылдың мектебі орналасқан басты көшесіне барды. Мұнда тау болып үйілген қоқыс бірден көзге түсті. Үйіндінің қасында қараусыз қалған ғимарат орналасқан. Оның да іші күл-қоқысқа толы. Антисанитариялық жағдайға қарамастан, бұл жерде балалар ойнап жүр. Көше шетіндегі суағар да қоқыстан тазартылмаған. Тратуардың жан-жағын басқан шөптен аяқ алып жүре алмайсың.
Елдімекендегі жалғыз мектептің стадионы ауылдық округ әкімдігінің балансында. Күтіп-баптауға солар жауапты. Бірақ, 1 -қыркүйек күні жаңа оқу жылы басталғанымен, стадион денешынықтыру сабағына дайын емес. Тікенекті шөп басқан алаң қараусыз қалған. Стадионның бір бұрышында кішігірім «Workout» алаңы да орналасқан. Алайда ол сапасыз салынғандықтан, орындықтарының ағашы түсіп, құрал-жабдықтары қирап, іске жарамай тұр.
Шеңгелдіде Кеңес заманында бой көтерген тұрғын үйлер аз. Соның бірінде балалар алаңы бар екен. Дегенмен оның да күтім көрмегеніне біршама уақыт болған.
Ауылда егістік алқаптарына, балық шаруашылықтарына апаратын жалғыз жол да 30 жылдан бері жөндеу көрмеген.
«Жол шұрық-тесік болып кеткен. Жөндеу жасалмағалы қателеспесем 30 жылдан асты. Машақатын шаруалар көріп отыр», — деді тұрғын Темірбек Көшербаев.
Тілшілер тілдескен көпбалалы ана Маржан Кенжегарина болса, интернет мәселесі туралы айтты.
«4 балам мектепте оқиды. Олар үйден шықса, таппай қалатын халге жеттім. Мамыр айында байланыс операторларының стансасы дауылдан құлап қалған. Содан бері ғаламтор жылдамдығымен алысып келеміз. Елдің бәрі билайн-ға ауысып жатыр. Бірақ, менің қалтам көтермейді. Тариф өте қымбат. Жауаптылар мәселені шешуге асығар емес», — деді Маржан Кенжегарина.
Бірінші түсірілім барысында байқалған проблемалар – осы. Аталған мәселелерге назар аударып, шешуді ауыл әкімдігінің еншісіне қалдырдық.
Посмотреть эту публикацию в Instagram
