Аталған нысан орналасқан 1,5941 гектар жер учаскесі 2004 жылы қала әкімінің қаулысымен жеке меншікке берілген болатын. Жердің бастапқы иесі – «Бөлек батыр Жалайыр» қоғамдық қоры. Алайда, 2022 жылдың 26 тамызында Алматы қаласының мамандандырылған ауданаралық экономикалық сотының шешімімен қор мәжбүрлі түрде таратылды.
Арада бір жыл өткен соң, нысан иесіз мүлік ретінде есепке алынды. Осыған байланысты Қонаев қаласының әкімдігі сотқа жүгініп, мемориалдық кешенді иесіз деп тану және коммуналдық меншікке беру туралы талап қойды. Үшінші тарап өкілі бұл талапты қолдап, кешеннің маңыздылығын атап өтті. Сонымен қатар, мемориалды күтіп-ұстауға қаржы қажет екенін және қазіргі уақытта нысан қараусыз қалғанын жеткізді.
Сот ҚР қолданыстағы заңнамаларына сәйкес, әкімдіктің талабын қанағаттандырып, нысанды мемлекет меншігіне қайтару туралы шешім шығарды. Енді мемориалдық кешен Қонаев қаласының мәдениет бөліміне өтеді және мемлекет қорғауында болады.
