Жағымсыз иіс шығарып, толықтай тозығы жеткен қолданыстағы нысанның орнына жаңа заманауи кәріз-тазарту жүйесін салу жоспарланып отыр. Қазіргі ескі нысан қала аумағынан шамамен 3–4 шақырым жерде орналасқан болса, жаңа кешен Қонаев қаласынан 15 шақырым қашықтықта бой көтереді.
Жобаның тапсырыс берушісі – Алматы облысының энергетика және сумен жабдықтау басқармасы. Құрылыс мемлекеттік-жеке меншік серіктестік аясында жүзеге асырылады. Жобадағы серіктес компания – «Daur Capital» ЖШС.
Мамандардың мәліметінше, жаңа нысанның құрылысы шамамен 20 ай ішінде аяқталады. Жобаның жалпы құны 33 млрд теңгеден асады.
Жаңа кәріз-тазарту жүйесінің қуаттылығы тәулігіне 25 текше метрден астам суды сүзгіден өткізуге мүмкіндік береді. Нысан 215 гектар аумақта салынып, заманауи технологиялық талаптарға сай жабдықталады.
Қазіргі таңда құрылысқа дайындық жұмыстары басталған. Негізгі технологиялық жабдықтар, құбырлар және жинақтаушы тоғандарға арналған гидрооқшаулағыш материалдар сатып алынған.
Жауапты мамандардың айтуынша, жаңа кешен іске қосылғаннан кейін тозығы жеткен ескі кәріз-тазарту жүйесі рекультивацияланып, экологиялық талаптарға сәйкес қалпына келтіріледі.
Айта кетейік, жаңа инфрақұрылым жобасы Қонаев қаласының экологиялық жағдайын жақсартып, тұрғындардың өмір сапасын арттыруға бағытталған.
