«Строитель» саяжайында тереңдігі 7 метр болатын құдыққа түсіп кеткен азамат қазіргі таңда шаһардағы ауруханада ем қабылдап жатыр.
Оқиға орнына депутаттар және қаланың тұрғын үй-коммуналдық шаруашылығы бөлімінің мамандары барды.
Депутаттардың айтуынша, жеңіл ақшаны көздеп, темір-терсектерді өткізіп жіберетіндер көбейген. Өкінішке қарай, вандализм тыйылмай тұр. Батпандап кірген ауру секілді, мемлекеттің мүлкін бүлдіру де қоғамның дертіне айналып барады.
«Дәл осы саяжайдағы құдықтар мәселесін үнемі қозғап жүрміз. Қонаев қалалық әкімдігіне депутаттық сауал жолданған. Алайда, құдықтардың беті әлі күнге дейін жабылмаған. Бұл жерге құлағандардың қай-қайсысы болса да мертігетіні анық. Қаладағы құдықтарға қатысты тұрғындардан 40-тан аса өтініш түсті», – дейді облыстық мәслихаттың депутаты Әсел Заирова.
Осы уақытқа дейін қаладағы аялдамаларды, ЛЭД экрандарды сындырған тұлғалар әкімшілік жауапкершілікке тартылған болатын.
