Чемпионат «спринт» қашықтығы бойынша, «Elite» (23 жастан жоғары) және «U19» (16-19 жас аралығында) санаттары үшін ұйымдастырылды.
Жарысқа 250 атлет қатысты. Бұл додада спортшылар 3 кезеңде бақ сынасты. Алдымен олар Қапшағай су қоймасында 750 метр қашықтықты жүзіп өтсе, кейіннен 20 шақырымдық веложарыс өтті. Ал 3-кезеңде атлеттер 5 шақырымға жүгірді.
«Темір Адам Кубогы» үшін ойын ережелері өзгертілген. Мұнда әуесқойлар 1500 метрге жүзді, велосипедпен 40 шақырым, жүгіріп 10 шақырымды бағындырды.
«U19» санатында қыздар арасында Ева Пинчук жеңіске жетті. Астаналық қыз бұл спорт түрімен бес жылдан астам уақыт айналысып келеді. Ал ерлер арасында Елмұрат Қанай (Алматы), Әли Жанат (Астана), Нұрасыл Халтаев (Түркістан облысы) жеңіске жетті.
«Elite» санатында әйелдер арасында астаналық Надежда Бекмағанбетова 1-ші болып келді. 2-орынды шымкенттік Арина Шульгина, 3-орынды Қостанай облысының тумасы Юлия Озерова иеленді. Сондай-ақ ерлер арасында Ақтөбе облысының спортшысы Дарын Қонысбаев 1-орынға тұрақтаса, 2-орынға алматылық Әнуар Тұрыбаев, 3-орынға астаналық Кирилл Рожков табан тіреді.
Айта кетейік, бұл шара ҚР Спорт және мәдениет министрлігінің қолдауымен ұйымдастырылды.
