Қаланың орталық алаңында өткен мерекелік шаралар ел бірлігі мен мәдениеттің көркем өрнегіне айналды.
25 киіз үй тігілген этноауылда ұлттық дәстүрлер таныстырылып, келген қонақтарға наурыз-көже, бауырсақ пен қымыз ұсынылды. Қазақ халқының салт-дәстүрі мен тұрмыстық ерекшеліктері көрермендерге кеңінен көрсетілді.
Алматы облысының әкімі Марат Сұлтанғазиев Наурыз тойына арнайы қатысып, жұртшылықты мерекемен құттықтады. Өз сөзінде ол:
«Бұл мейрам бізді біріктіретін, жаңаруға жетелейтін ұлы күн. Дәстүрлерімізді ұрпақтан-ұрпаққа жеткізу — халқымыздың тұтастығы мен қуатын арттырады», — деп атап өтті.
Мерекелік іс-шараға Венгрия, Қытай, Қырғызстан, Литва, Түркия, АҚШ, Моңғолия, Үндістан елдерінің дипломатиялық миссиялары мен БҰҰ өкілдері, сондай-ақ белгілі мәдениет және өнер қайраткерлері қатысты. Бұл — Наурыздың халықаралық деңгейде мойындалған, баршаға ортақ құндылық екенін тағы бір мәрте көрсетті.
Мереке аясында қолөнер жәрмеңкесі, ұлттық спорт түрлерінен жарыстар, ашық аспан астындағы концерттер ұйымдастырылды.
Қалалық саябақ пен орталық алаң мейрамның рухын толық сезіндіріп, қала тұрғындары мен қонақтарына ерекше көңіл-күй сыйлады.
Алайда көрермендерді ерекше тебіренткен сәт.
Нұрғиса Тілендиевтің 100 жылдығына арналған күй тарту болды.
Талғар ауданының мектеп оқушылары қатысқан “Күй күмбірі” челленджінде 100-ге жуық домбырашы бір мезетте “Ата толғауын” орындап, ұлы сазгерге деген құрметті күймен жеткізді.
Бұл – тек өнер емес, ұлттық рухтың жаңғырығы еді.
21 наурыз кешінде танымал әншілердің қатысуымен өткен гала-концерт мерекелік көңіл-күйді шарықтау шегіне жеткізсе, 22 наурыз күні барлық аудан мен ауылдық округтерде Наурыз кеңінен жалғасын тапты.
