Қонаев қаласының 1-ықшам ауданы жасөспірімдері арасында аула футболынан турнир ұйымдастырылып, аймақтың спорттық өмірінде маңызды оқиғаға айналды. Турнир барысында командалар өздерінің шеберліктерін, жеңіске деген жігерін көрсетіп, көрермендерге ұмытылмас әсер сыйлады. Ойыншылардың ерік-жігері мен командалық рухы әсіресе көзге түсті, деп хабарлайды alataunews.kz.
Жарыс қорытындысы бойынша жеңімпаздар:
- «Айғырлар» – команда турнир бойы сенімді ойын көрсетіп, өзінің фаворит екенін дәлелдеді.
- «MC Wow» – жанкүйерлерді тамаша комбинацияларымен таң қалдырған жастық жігердің үлгісі болды.
- «Қыран» – қажырлы еңбек пен табандылығының арқасында жүлдегер атанды.
- «Champions» – лайықты қарсылас ретінде үздік төрттікке енді.
- «Atlant» – шеберлігін көрсетіп, болашақта үлкен жетістіктерге қол жеткізуге әлеуеті бар екенін байқатты.
Турнир жас футболшыларға тек спорттық шеберліктерін көрсетуге ғана емес, сонымен қатар командалық бірлік пен достықтың маңыздылығын түсінуге мүмкіндік берді.
«Осындай спорттық шаралар жастардың бойында жеңіске деген құлшынысты, шеберлікті дамытуға үлкен әсер етеді. Біз мұндай бастамаларды әрқашан қолдауға дайынбыз,» – деп атап өтті кәсіпкер Бақыт Алтаев.
Айта кетерлігі, турнирдің басты демеушісі және жастардың спортқа деген қызығушылығын арттыруға ерекше үлес қосқан – «Saperavi» мейрамханасының иесі Бақыт Алтаев.
