«Екі қала үшін үшін қазіргі уақытта бір әуежай жеткілікті. Біз үшін қазір әуежайдан бұрын Алматы мен Қонаев қаласы арасында жолаушы тасымалдау мәселесін шешу маңыздырақ. Қазіргі уақытта екі қала арасында қоғамдық көлік қатынамайды. Бұл мәселе субсидия бөлуді талап етеді. Бір ғана теміржол бар, оның өзі қалаға тоқтамайды, тек Қытай шекарасына бір-ақ өтіп кетеді. Бізге Қонаев-Алматы бағытында қосымша әуежай терминалы арқылы қатынайтын жеңіл рейсті жол салу керек. Өйткені, екі қала арасында жұмысқа қатынайтын жолаушылар легі үлкен», — деді Арслан Дандыбаев.
Облыс басышылығы жолаушы тасымалын осылай ұйымдастыру арқылы мультипликативті нәтижеге қол жеткізбек. Арслан Дандыбаев бұдан кейін облыс орталығында әлеуметтік маңызды нысандар салу өте өзекті деп отыр.
«Бізге мектептер, ауруханалар, балабақша салу керек. Жеке инвестиция саламын деушілерді қолдаймыз. Біздің тараптан тұрғын үй коммуналдық шаруашылық басқармасы басшылығымен бірлесіп, инфрақұрылымдық мәселелерді шешуге ат салысамыз», — деді Арслан Дандыбаев.
Мәселен, тек 2023 жылы облыс аумағында 43 мектеп салу жоспарланып отыр. Алматы облыстық құрылыс басқармасы басшылығы оны жүзеге асырудың үш механизмі қарастырылғанын айтты. Біріншісі, бірқатар мектептер біріңғай оператор «Самұрық-Қазына» ұлттық әл-ауқат қоры арқылы салынбақ. Қалған екеуі (мемлекеттік-жеке әріптестік және құрылысы аяқталған мектепті сатып алу) жеке инвесторлар тарту арқылы жүзеге асырылады. Сонымен қатар, қалаға көпфункционалды спорт кешені, мәдениет үйі сияқты нысандар салу көзделіп отыр.
Қазіргі уақытта Қонаев қаласында тағы бір өзекті мәселе – тұрғын үй құрылысы. Алматы облысы құрылыс басқармасының берген мәліметі бойынша, Қонаев қаласындағы мемлекеттік аппарат қызметкерлерінің өзін ғана есептегенде 6 мың пәтерге қажетілік бар.
Айта кетейік, Қонаев қаласының бас жоспары әлі бекітілген жоқ. Облыс басшылығы қазір инвесторлармен кездесіп, үздік жобаларды іріктеп жатыр.
Осыған дейін Қонаев маңында G4 City жобасын іске асыру жұмыстары басталып кеткен болатын. Оның концепциясы бойынша серіктес қала төрт тақырыптық аймақтан тұрады:
- Gate district — жаһандық қаржы-бизнес кластері;
- Golden district — білім беру және медициналық кластер;
- Growing district — экспортқа бағытталған сауда-логистикалық орталық;
- Green district — интеграцияланған мәдениет және демалыс орталығы.
