Алматы облысы орталығы мәртебесін алғаннан кейін қалаға кіреберіске қар барысының мүсіні орнатылды. Журналистер шаһар келбетін келістіріп тұрған мүсінді көріп қайтты.
«Қалада жалпы саны 12 нысан абаттандырылады. Оған орталық алаңдағы Д.Қонаев ескерткішін абаттандыру, сол жердегі аллеяны заманауи демалыс орны ету, қар барысының мүсіні, Қонаев көшесінің бойындағы «Workout» балалар мен ересектерге арналған алаңдары, муралдар салу, кіреберістегі «Қонаев» жазуы және т.б. нысандар кіреді», — деді тілшілерге сұхбат берген қала әкімінің орынбасары Марлан Жолдахмет.
Оның сөзіне сүйенсек, қаланың кіреберісіндегі қар барысының мүсіні — Алматы облысының символы ретінде бой көтерді. Бұл жерде тек мүсін ғана орнатылып қоймай, адамдардың күндізгі және түнгі уақытта демалуларына, суретке түсулеріне қолайлы жағдай жасалды. Және теміржол бойына шаһардың жаздыкүнгі тыныс-тіршілігі бейнеленген паннолар орнатылды.
«Қаланың сәніне жауапты — «Urban» ЖШС. Бұған дейін 4 мурал болса, қосымша 6 мурал салынды. Қазірдің өзінде көрсе көз тартатын қоғамдық орындар көбейді. Мысалы, Қонаев көшесінің бойындағы аллеяны Президент Қасым-Жомарт Тоқаев жаяу аралағанын білесіздер. Бұл жұмыстар әлі де жалғасады», — деді қала әкімінің орынбасары.
Марлан Жолдахметтің айтуынша, бүгінде қаладағы «Астана» аллеясының құрылысы аяқталуға жақын. Шағын Арбат көшесінің инфрақұрылымы толығымен жаңартылды, кішігірім сәулет нысандары, түтін фонтаны салынды.
