Мұны баспасөз брифингінде аудан әкімі Жасұлан Естенов айтты.
«Ауданда асфальт төселмеген 700 шақырым жол бар. Оны жөндеуге бірнеше жыл қажет екені анық. Сондықтан біз биыл жол құрылысының көлемін былтырғыға қарағанда екі есе көбейттік. Яғни, биылғы жылы 70 шақырым жол жөндеуден өтеді», — деді аудан әкімі.
Жасұлан Естеновтың сөзіне сүйенсек, инфрақұрылымдық желілерді тартудағы бәсеңдіктің себебі – жаңа шағын аудандар мен саяжай массивтерінің көбеюінде.
«Соңғы санақ қателеспесем 2012 жылы жүргізілген. Ол кезде халық саны 180 мың болған. Одан бергі он жылда тұрғындар саны екі есе көбейіп, 320 мыңға жеткен. Сәйкесінше, жаңа шағын аудандар, саяжайлар күн санап өсіп келеді. Ал инфрақұрылымды тарту осы қарқынға үлгермей жатыр», — деді әкім.
Сондай-ақ Жасұлан Естенов Жібек жолы бекетін айналып өтетін, жалпы ұзындығы 7 шақырымға созылған автомобиль көпірінің құрылысы жүріп жатқанын атап өтті. Жоба құны 18,3 млрд. теңге.
Айта кетейік, соңғы деректерге сәйкес аудандық жолдардың деңгейі жақсы және қанағаттанарлық жағдайда, 93,1%-ға жеткен.
