Бүгін аса көрнекті мемлекет және қоғам қайраткері Дінмұхаммед Ахметұлы Қонаевтің туғанына 114 жыл толды. Қонаевты тек мемлекеттік лауазым иесі деп ойлайтындар көп. Ал шындығында ол қарапайым адам болды: күзетсіз және жеке көліксіз жүрген, аңшылықты жақсы көрген, қару-жарақ пен тұтатқыштар жинаған. Алматыны апаттан аман сақтаған бөгет салуға өзі басшылық жасаған. Біз сіздерге осындай көпшілікке беймәлім қызықты фактілер ұсынамыз!
- Қонаев басқарған жылдары Қазақстанда 43 қала бой көтерді.
- Оның жетеуі Алматы және Жетісу облысында салынды: Есік, Қаскелең, Сарқан, Талғар, Үшарал, Үштөбе және Қапшағай. Бұл қалалар аймақтық экономиканың тірегіне айналды.
- Қонаев басқарған 22 жылда ел Экономикасы 7 есе, өнеркәсіп 8,9 есе, ауыл шаруашылығы 6,2 есе, құрылыс 68 есе өсті. Халық саны 2 есе артты.
- 1967 жылы Алматыны селден қорғау үшін бөгет салу жұмыстарына Қонаев өзі басшылық етті. 1973 жылы сол бөгет қаланың шығыс бөлігін жойқын апаттан сақтап қалды.
- Оның тұсында зауыттар, шахталар, электр станциялары салынды.
- Университеттер мен ғылыми орталықтар ашылды. Себебі, Қонаев ел болашағын білімді ұрпақпен байланыстырды.
- Аңшылықты жақсы көрген, қару мен 476 тұтатқыштан тұратын коллекциясы болған.
- Атқарған еңбегі үшін көптеген марапаттар мен ел құрметіне ие болды. Соған қарамастан қарапайым өмір сүрді.
Дінмұхаммед Қонаевтың ең үлкен мұрасы — атағы емес, абыройы. Ол тарихта қызметімен қатар, жауапкершілігімен қалған тұлға. Мұндай ұлы тұлғалардың өнегелі өмірі — өткеннің ғана естелігі емес, бүгінгі күнге сабақ, ал келер ұрпақ үшін биік рухани бағдар болып қала береді.
