Қазіргі уақытта жергілікті билік Қонаев қаласында туристік экономиканы дамыту бойынша жоспарлар әзірленіп жатыр. Сонымен қатар туризмнен түсетін салық кірісі тек жаз айларында емес, қыста да түсетін болады.
Дандыбаевтың пікірінше, экономиканы көтеру үшін өңірде көрікті жерлер де, әлеуеті жоғары инвесторлар да жетерлік.
«Қонаев төңірегіндегі туризмді дамыту керек. Мәселен, Есік көлінің болашағы үлкен, Көлсай көлдерінен кем түспейді. Түрген шатқалы бойынша да жоспарлар бар. Еңбекшіқазақ ауданы елімізде ең тығыз қоныстанған елдімекен. Сол жердің жергілікті тұрғындарының өздері этнотуризмнің дамығанын қалайды», – дейді Дандыбаев Алматы облысының бизнес-қоғамдастығымен кездесуінде.
Оның айтуынша, Көлсай көлдеріне барар жолда орналасқан Саты ауылында соңғы екі жылда 100-ден астам «қонақ үй» ашылған. Бірақ оларды қонақ үй деп айтуға келмейді. Ауыл тұрғындары өз үйлерін кішігірім қонақ үйге айналдырып, ішіне жуынатын бөлме, дәретхана орнатып, жиһаз қойып туристерге жалға беріп жүр. Бірақ табысын жасырады.
«Кәсіпкерлердің көбісі заңды жұмыс істегісі келмейді. Қапшағайда да ұқсас жағдай. Салықтан жалтару үшін олар туристердің тек 25-30% көрсетеді. Бұны қолға алу керек. Мәселен, Алакөлде 5 жыл жұмыс істеп, кәсіпкерлерге бизнеспен таза айналысуға шақырдық. Бизнеспен ашық айналысса сақтандыру және мемлекет тарапынан қолдау болатынын түсіндірдік», – деді Дандыбаев.
Тынығу үшін салынған ағаш орындарды туристер тонған кезде жылыну үшін жағып жіберген жағдай туралы да айтты әкімнің орынбасары.
«Біз этнотуризмді дұрыс құруды үйренуіміз керек. Ең бастысы – мәдениет. Бізден Көлсайға жол жасауды сұрады – жасадық. Қазір көлге күніне 5 мың демалушы келеді. Біз туристерге арнап демалып, отыратын орындарды да қойдық. Алайда адамдар оны отын ретінде жаққан», – деді әкім орынбасары.
Тағы бір мәселе – көлге лақтыратын қоқыс.
«Демалушылар катамарандарға мінгенде өздерімен алып келген бөтелке, темекі тұқылдарын суға лақтырады. Бұл — үлкен мәселе. Туристердің экологиялық мәдениетін дамытуымыз қажет», – деді Дандыбаев.
