— Бағдагүл Саметқызы, «Кәусар» орталығы туралы айтып берсеңіз. Ерекшелігі неде?
— Біздің орталық медициналық оңалтудың көпсалалы мекемесі. Біз түрлі аурулар мен операциялардан кейін науқастардың денсаулығын қалпына келтіруге және олардың толыққанды өмірге оралуына кешенді көмек көрсетеміз.
Орталықта жүрек-қан тамырлары және жүйке жүйесі ауруларынан, өкпенің созылмалы сырқаттарынан, сондай-ақ сүйек-буын ауруларына жасалған хирургиялық түзетулерден кейінгі пациенттер оңалтудан өтеді. Негізгі мақсатымыз — ағзаның жоғалтқан қызметін қалпына келтіру немесе оның орнын толтыру және адамның өмір сапасын жақсарту.
— Орталықта қандай оңалту әдістері қолданылады?
— Біз емдік дене шынықтыруды, физиотерапияны, тыныс алу жаттығуларын және жалпы нығайтушы шараларды ұштастыратын кешенді тәсілді қолданамыз.
Емдік гимнастиканың орны ерекше. Соның ішінде Стрельникова әдісі бойынша парадоксты тыныс алу жаттығулары бар. Динамикалық тыныс алу жаттығулары тыныс алу жиілігі мен тереңдігін қалыпқа келтіріп, бронхтардың дренаждық қызметін жақсартады, мұрын арқылы тыныс алуды қалпына келтіреді және зат алмасу үдерістерін реттейді.
— Қандай аппараттық физиотерапия әдістері бар?
— Орталықта физиотерапиялық ем-шаралардың кең спектрі қолданылады:
«Биоптрон» жарық терапиясы — қабынуға қарсы және ауырсынуды басатын әсері бар;
«Полимаг-01» аппаратымен төмен қарқынды магнитотерапия — иммуномодуляциялық және бронхолитикалық әсер береді;
СВЧ-терапия;
дәрілік электрофорез;
ультракүлгін сәулемен емдеу (УФО);
электросон;
дарсонвализация;
ингаляциялық терапия.
Әрбір ем-шара науқастың диагнозы мен жалпы жағдайына қарай жеке тағайындалады.
— Орталықта спелеотерапия жүргізіледі. Оның артықшылығы неде?
— Спелеотерапия — жасанды түрде құрылған тұзды шахта микроклиматы жағдайында ем жүргізу әдісі. Құрғақ тұзды аэрозоль тыныс алу, жүрек-қан тамырлары және иммундық жүйелерге оң әсер етеді, бактерицидтік қасиетке ие. Әдетте 10–15 сеанстан кейін науқастар өз жағдайының жақсарғанын байқайды. Орталықта балалар мен ересектерге арналған жеке тұзды бөлмелер қарастырылған.
— Емдік дене шынықтырудың маңызы қандай?
— Емдік дене шынықтыру — оңалту үдерісінің негізі. Біз иық буынының, басқа да буындар мен омыртқаның қозғалыс көлемін қалпына келтіруге арналған заманауи тренажерларды қолданамыз. Жаттығу параметрлері медицина қызметкерлерінің бақылауымен әр науқасқа жеке бейімделеді.
Сонымен қатар кешенге емдік массаж, парафинотерапия, прессотерапия (лимфодренаждық массаж), оттегі коктейльдері және диетотерапия кіреді.
— «Кәусар» орталығының басты ұстанымы қандай?
— Біз кешенді, қауіпсіз әрі тиімді оңалту қағидатын ұстанамыз. Мақсатымыз тек симптомдарды жою емес, науқастың өмір сапасын толық қалпына келтіру. Әсіресе балаларға ерекше көңіл бөлеміз: барлық ем-шаралар барынша жайлы әрі ауырсынусыз өткізіледі.
— Алдағы жоспарларыңызбен бөліссеңіз.
— Материалдық-техникалық базаны жаңғырту, оңалту қызметтерінің аясын кеңейту және жаңа технологияларды енгізу жоспарымызда бар. Орталықтың басты құндылығы кәсіби мамандар ұжымы және әр науқасқа жеке көзқарас.
Бағдагүл Саметқызына мазмұнды сұхбаты үшін алғыс білдіреміз.
