«Біз, 1981-1998 жылдары туған жігіттер бірлесіп, ауылға спорт зал салып беруге шешім қабылдадық. Себебі елдімекендегі мектептің спорт залы үнемі бос болмайды. Ал балалардың жаттығуға деген ықыласы зор. Қазіргі таңда бұл жерде 3 жаттықтырушы қызмет етеді. Бокс үйірмесіне 40, еркін күреске 25, каратэге 20 бала қатысады», — дейді ауыл жігіттерінің басын қосып, залдың бой көтеруіне ұйытқы болған Мұхит Дүнгешев.
Оның айтуынша, аймақ азаматтары былтыр «Батыр боламын» қорына материалдық базамен қамтамасыз етуді сұрап өтініш жасаған. Қор «Қазақстан халқына» қоғамдық қорының көмегіне жүгінген.
«Қазақстан халқына» қоғамдық қорымен бірлесіп, жыл соңына дейін еліміздің түкпір-түкпірінен 24 спорт залын ашуды мақсат етіп отырмыз. Қоғамдық қордың басты қызметі — жарақтандыру. Ал біздің «Батыр боламын» қоры әкімшілік жұмыстармен қатар жаттықтырушылардың еңбекақысын реттеу секілді мәселелермен айналысады. Екі қордың да мақсаты — балаларды спорт арқылы тәрбиелеу, 10 000 оқушыны тегін үйірмемен қамтамасыз ету», — дейді «Батыр боламын» қорының президенті Арман Уахап.
«Қазақстан халқына» қоғамдық қоры бұл залдың жабдығына 7,7 млн теңге қаржы бөлген.
Осы шараға орай ауылда салтанатты басқосу өтті. Жиынға облыстық спорт басқармасының басшысы Нұрбақыт Теңізбаев, ауыл ақсақалдары, жастар, спортшылар мен жаттықтырушылар қатысты.
Ауыл әкімі Марат Сүгірбаев «Батыр боламын» қорына алғыс хат табыс етті.
Жиын соңында спорттық үйірмеге қатысып жүрген балалар өз өнерлерін көрсетті.
Посмотреть эту публикацию в Instagram
