«Былтыр Түрген тау шатқалында «Туранга Групп» ЖШС-нің «Түргенсай» визит-орталығы ашылды. «Батыс Еуропа – Батыс Қытай» Республикалық тас жолының бойында ауданға келген туристерді және жолаушыларды қабылдауға арналған заманауи қызмет көрсету кешені іске қосылды. Биыл Батанда «Туранга Групп» ЖШС екінші визит-орталығын ашу жоспарланып отыр. Мұның барлығы инвестициялық жобалар», — деді бөлім басшысы.
Оның айтуынша, Еңбекшіқазақ ауданында туризм саласындағы қызметті жүзеге асыратын 29 нысан тіркелген.
«Статистикалық деректерге сәйкес, былтырғы жылдың 9 айында ауданға келген туристер саны — 9 442 адам. Көрсетілген қызметтер көлемі 124,0 млн. теңгеге жетті. Ал Іле-Алатау ұлттық табиғи паркінің мәліметіне сәйкес, 2022 жылы Түрген тау шатқалы мен Есік көліне жалпы саны 82,7 мың адам келген», — деді Нұрболат Серғали.
Сондай-ақ бөлім басшысы аудан әкімдігі тарапынан туризм саласын дамыту мақсатында концепция дайындалып облыстағы тиісті басқармаға жолданғанын айтты.
«Концепцияда негізінен аудан аумағынан туризм бағыттарын ашу, Есік көлі мен Түрген шатқалында инфрақұрылымдық желі тарту, туризм нысандарының жұмыс тәртібі, алдағы уақытта дамыту жұмыстары көрсетілген», — деді бөлім басшысы.
Нұрболат Серғалидің сөзінше, Еңбекшіқазақ ауданында көші-қон рәсімдерін оңтайландыру мақсатында әзірленген «E-qonaq» ақпараттық жүйесіне көшіру бойынша жұмыстар жүргізіліп жатыр.
