ҰҚК Астанада Қаңтар оқиғасы кезінде ұрланған қарулар табылды, деп хабарлайды alataunews.kz.
Шілде-тамыз айларында Ұлттық қауіпсіздік комитеті Бас прокуратураның үйлестіруімен Астана және Щучинск қалаларында атыс қаруы мен оқ-дәрілердің заңсыз айналымына қатысы бар адамдар тобының заңға қайшы әрекеттерінің жолын кесу бойынша арнайы операциялар жүргізді. Астанадағы тінту барысында қаңтардағы тәртіпсіздіктер кезінде ұрланған 2 «Калашников» автоматы мен 43 оқ-дәрі, ал Щучинскіде 7 атыс қаруы, 4 тапанша және 1500-ден астам әртүрлі калибрлі оқ-дәрі тәркіленді.
Қазіргі уақытта сот-баллистикалық сараптамалар тағайындалып, сотқа дейінгі тергеу амалдары жүргізілуде. Жалпы, биыл жыл басынан бері ҰҚК полиция органдарымен бірлесіп, қарудың заңсыз айналымына қатысы бар 13 арнаны және қару-жарақ жасайтын 2 жасырын цехты жойды. Нәтижесінде 41 автомат, 203 мылтық, 121 тапанша, 57 қол гранатасы, 1 гранат атқыш, 44 жарылғыш құрылғы және 11 138 патрон тәркіленді.
