Министрге таныстырылым жасаған сала маманының мәліметінше, қазіргі таңда Шелек пен Қазыбек бек индустриалды аймақтарының құрылысы жоспарланып жатыр. 4 аймақтың ішінде ең үлкені — Қазыбек бек. Ол Жамбыл ауданында салынады. Жер көлемі — 900 гектар.
«Қазыбек бек индустриалды аймағы 5 бөлікке бөлінген. Бұл жерде түрлі саладағы өнеркәсіп орындары орналасады. Аймаққа инфрақұрылымдық желілердің барлығын тарту үшін алдын ала есеп бойынша 53 млрд теңге қажет. Қазіргі таңда жобалық-сметалық құжаты (ЖСҚ) дайындалып жатыр», — деді маман.
Ал министр Марат Қарабаев болса, 53 млрд теңге бірден бөлінбейтінін алға тартты.
«Алдымен техникалық-экономикалық негіздеме (ТЭН) жасап, кейіннен ЖСҚ әзірлеуге көп уақыт кетеді. Сондықтан мен сіздерге 900 гектарға ТЭН-ні жаңадан қабылданған ереже бойынша жасауды ұсынамын. Яғни, сатылы негіздеме дайындауларыңыз қажет. Бұл құжаттың өзінде «П сатысы» болады. Аталған саты ЖСҚ-сыз құрылыс бастауға, ақша бөлуге мүмкіндік береді. Ал қаржы жағына келсек, 53 млрд теңге бірнеше бөлікке бөлініп, индустриалды аймақ кезең-кезеңімен қаржыландырылады», — деді министр.
