Еліміздің Алматы облысымен қатар, бүкіл республика аумағына тікелей эфир арқылы хабар тарататын бұл арнаның тізгінін елімізге танымал тележүргізушілер ұстамақ.
Телеарнаның директоры қызметін – Қымбат Хангельдина, ал бас продюсер міндетін – Қымбат Досжан атқарады. «Qonaev Media» деп аталатын телерадиокешен жаңалықтарға негізделіп, қазақ және орыс тілдерінде тәулігіне 12 сағат хабар таратады.
«Мамыр айынан бастап арнамыз кезең-кезеңімен іске қосылады. Қазіргі таңда жұмыс жоспары дайындалып жатыр. Штат саны – 80 адам. Негізгі шығармашылық топ жасақталды. Дегенмен телеарнаның «ыстығына күйіп, суығына тоңуға» дайын кәсіби мамандарды іріктеп, қатарымызға қосуға әзірміз», – деді «Qonaev Media» телерадиокомпаниясы» ЖШС директоры Қымбат Хангельдина.
Облыстық арна болғандықтан, қаржыландыру Алматы облысының бюджеті есебінен жүзеге асырылады. Дегенмен, арна өз аудиториясын қалыптастырып, көрермен сенімін иелене алса, алдағы уақытта іскерлік жобаларды іске асырып, өзін-өзі қамтамасыз ететін медиа алаңға айналуы да жоспарда бар.Ақпараттық хабарлар күн сайын үш рет тікелей эфирде ұсынылады. Бұған қоса, апта сайын сараптамалық бағдарламалар мен түрлі бағыттағы жобалар көрерменге жол тартады.
«Өңірдің әлеуеті зор. Сол себепті мәдениет, спорт және туризм салаларын қамтитын циклдік жобалар әзірленіп жатыр», – деді бас продюсер Қымбат Досжан.
Арна іске қосылғанымен, қазіргі таңда арна ұжымы уақытша Алматы қаласындағы кеңседе жұмыс істеп жатыр. Болашақта облыс орталығы – Қонаев қаласында арнайы медиаорталық салынып, ұжым толықтай сонда көшіріледі.
Айта кетейік, алдағы уақытта телеарна құрамынан жергілікті радио ашылып, эфирде хабар таратуды бастау жоспарда бар.
