Цифрлық мониторинг жүйесі Мемлекет басшысының 2023 жылғы 11 маусымдағы тапсырмасы аясында жүзеге асырылуда. Қазіргі таңда Алматы облысы аумағындағы Бақанас, Қаскелең, Күрті, Шелек және Қарадала орман шаруашылықтарында 18 аппараттық-бағдарламалық кешен орнатылған.
Жүйеге қосылған заманауи бейнекамералар тәулік бойы өрт қаупі жоғары аймақтарды бақылап, түтін мен от тұтану ошақтарын ерте кезеңде анықтайды. Барлық ақпарат нақты уақыт режимінде жедел қызметтерге жеткізіліп, өрттің алдын алуға және оның таралуына жол бермеуге мүмкіндік береді.
Алматы облысының табиғи ресурстар және табиғатты пайдалануды реттеу басқармасы мәліметінше, қабылданған шаралар айтарлықтай нәтиже берген. 2022 жылы орман өрттері шарпыған аумақ 784 гектардан асса, 2025 жылы бұл көрсеткіш 53 гектарға дейін қысқарған. Мамандардың айтуынша, бұл — шамамен 14 есе азайғанын көрсетеді.
Өрттің алдын алу шаралары орманды қалпына келтіру жұмыстарымен тығыз байланысты. 2021–2025 жылдарға арналған екі миллиард ағаш отырғызу жөніндегі ұлттық жоба аясында Алматы облысында 43,7 миллион ағаш отырғызылып, 19,8 мың гектар аумақ қамтылды. Орман отырғызу және тұқым себу жұмыстары 100 пайызға орындалған.
Алдағы жылдары бұл бағыттағы жұмыстар жалғасады. 2026–2027 жылдары өңірде қосымша 8,9 миллион ағаш отырғызылып, 4 мың гектар жер көгалдандырылмақ.
Сарапшылардың айтуынша, жаңа технологияларды енгізу мен ауқымды орманды қалпына келтіру жұмыстары табиғи өрттердің алдын алып қана қоймай, жасыл аймақтардың көлемін ұлғайтып, өңірдің экологиялық қауіпсіздігін нығайтуға мүмкіндік береді.
