Аталған жағдайға байланысты Алматы облысы әкімдігі ресми түсініктеме беріп, анықталған ақаулар жақын күндері толық жойылатынын мәлімдеді.
Облыстық білім басқармасына мектеп ғимаратындағы төбеден су ағуы туралы тұрғындардан өтініш келіп түскен. Осыдан кейін жергілікті атқарушы органдар дереу нысанға барып, жағдайды көзбен көріп тексеріп, құқықтық баға берген.
«Алматы облысының білім басқармасына мектеп ғимаратында төбеден су ағуы туралы өтініш келіп түсті. Осы өтінішке байланысты жауапты органдар шұғыл түрде нысанға барып, визуалды тексеру жүргізді», — делінген әкімдік хабарламасында.
Әкімдіктің мәліметінше, анықталған олқылықтар сол күні-ақ мердігер ұйымға ресми түрде жеткізілген. Жөндеу жұмыстарын жүргізген компания барлық кемшілікті белгіленген мерзімде жоюға міндеттеме алған.
«Тексерушілер анықтаған ақауларды мердігер ұйым «Arsh Stroy» ЖШС 1 ақпанға дейін толықтай жояды», — деді әкімдік өкілдері.
Қазіргі уақытта мектеп ғимаратында облыс әкімдігі өкілдері, мәслихат депутаттары және «Amanat» партиясының төрағасы жүр. Жағдай жауапты мемлекеттік құрылымдардың тұрақты бақылауында.
Сонымен қатар, мектептің жертөле бөлмесінде судың жиналғаны тіркелген. Қазіргі кезде су сорылып, бөлмелер кептіріліп жатыр. Ылғалдың пайда болу себептері анықталып жатыр.
Әкімдік өкілдерінің айтуынша, дренаж жұмыстары бұған дейін басталғанымен, толық аяқталмаған. Бұл жұмыстарды ауа райы қолайлы болған жағдайда жалғастырып, толық аяқтау жоспарланған.
Әкімдіктің дерегіне сәйкес, №20 мектеп 2013 жылы пайдалануға берілген. Нысан 900 оқушыға арналғанымен, бүгінде онда шамамен 1 800 бала білім алып жатыр. Сабақ екі ауысымда өтеді.
Мектеп 2024 жылғы 21 мамырда күрделі жөндеуге жабылып, 2025 жылғы 1 қыркүйекте қайта жұмысын бастаған. Жөндеу жұмыстарының тапсырыс берушісі — Іле ауданының әкімдігі.
