«Бүгін облыстағы денсаулық сақтау мекемелерін араладық. Қордаланған мәселелер баршылық. Олар: медициналық мекемелердегі тозығы жеткен құрыл-жабдықтар мен кадр тапшылығы, сондай-ақ нысандардың жеткіліксіздігі. Ауылдық жерлердегі денсаулық сақтау нысандарын дамыту жөнінде арнайы ұлттық жоба бар. Соның аясында үш жылдың ішінде елімізде 600-ден астам нысан салынады. Оның 38-і Алматы облысында. Бағдарлама бойынша жұмыстар денсаулық сақтау министрлігінде жүріп жатыр», — деді Алтай Көлгінов.
Сонымен қатар ол республика бойынша 32 ауданаралық ауруханалардың күшейтілетінін айтты.
«Демек, ауруханаларда қосымша медициналық құрал-жабдықтар қойылады, дәрігерлердің біліктілігі арттырылады. Ал Алматы облысында бұл бағдарлама аясында 2 жоба жүзеге асырылады. Бұл мәселе де бақылауға алынған. Бағдарламаның толыққанды жұмыс жасауы үшін қыруар қаражат қажет», — деді Премьер-Министрдің орынбасары.
Алтай Көлгінов Еңбекшіқазақ ауданында орналасқан орталық аурухананың жұмысымен танысқанын да айта кеткен жөн. Аурухананың басшылығы вице Премьер-Министрге құрал-жабдықтардың жетіспеушілігі, дәрігер тапшылығы және МӘМС жүйесіндегі бірқатар мәселелерді жеткізді.
