Жыл басынан өңір орталығында 9 егіз дүниеге келген. Бақанастық Гауһар Нүсіпбай төртінші баласын құшағына алған ананың бірі. Төрт баланың үшеуі кесір тілігінің көмегімен дүниеге келген. 28 жастағы көпбалалы ананың Қонаев қаласындағы перзентхана ұжымына айтар алғысы шексіз.
«Қанша мәрте баланы өмірге әкелсең де, перзентханаға келген сайын бойыңды қорқыныш пен үрей қатар билейтіні бар. Ал ақ халаттылардан жылы сөз есту, қолдау көру жаныңа медеу сыйлайды», – дейді жас ана.
Бұл перзентханада 30-дан аса маман қызмет етеді. Оның төртеуі гинеколог, алтауы акушер, 3 неонотолог дәрігер мен 16 медбике бар. Жүкті келіншектермен жұмыс жүргізу оңай емес. Әр анамен жеке тіл табысу, сәбиді дүниеге әкелгенге дейінгі, кейінгі кеңес пен қолдау көрсету тағы бар. 17 жылдан бері осы салада талмай еңбек етіп келе жатқан білікті маманның қатарында Раушан Әбдуғалиева да бар.
«Келіншектер түрлі диагнозбен келеді. Қан қысымы жоғары болып, кейде жан сақтау бөліміне жатқызамыз. Кесір тілігімен баланы алатын кездер де кездеседі. Барлығы аман-есен үйлеріне шығарылады. Ауыр оталар жасап, аналарға қажетті ем-домды да көрсетеміз», – дейді қалалық көпсалалы ауруханасының перзентхана бөлімінің меңгерушісі, акушер-гинеколог дәрігер.
Демография — мемлекет дамуының кепілі. Ал бала қазақ үшін ұрпағының жалғасы. Елімізде көпбалалы болуды қалайтын отбасылар көбеюде. Сондықтан халық санының 20 миллионға жетер күнде алыс емес. Айта кетерлігі, қалалық емханада аналарға медициналық көмек МӘМС аясында тегін көрсетіледі.
