ҚР Еңбек және халықты әлеуметтік қорғау министрі Светлана Жақыпова Костенко атындағы шахтада болған өрт кезінде қаза тапқандардың отбасыларына қандай көмек көрсетілетінін айтты.
«Мемлекет тарапынан қазақ тапқан шахтерлердің отбасыларына асыраушысынан айырылғаны үшін төлемдер төленеді. Біріншісі – базалық жәрдемақы, екіншісі – әлеуметтік сақтандыру қорынан, үшіншісі – өмірді сақтандыру компаниясынан төленеді. Төлемдердің орташа мөлшері 400 мыңнан 500 мыңға дейін жетеді. Және ол төлемдер асырауында болған жасөспірімдер, 18 жасқа толғанша, егер балалар мектептен кейінгі жоғары білім алып жатса – 23 жасқа толғанша беріледі», — деді министр.
Сондай-ақ «АрселорМиттал Теміртаудың» ұжымдық шартына сәйкес, компания міндетті түрде қаза тапқан шахтердің отбасына 10 жылдық еңбекақысын төлейді.
Оған қоса ҚР Үкіметінің сайты көз жұмған жұмысшылардың жанұяларына көрсетілетін қолдау шараларының толық тізімін жариялады:
– компания қаражаты есебінен отбасыларға баспана сатып алу;
– моральдық зиян үшін 10 жылдық жалақы мөлшерінде біржолғы төлем;
– асырауында болған балаларға 18 жасқа толғанға дейін ай сайынғы сақтандыру төлемі (ЖОО студенті болса, 23 жасқа дейін);
– Мемлекеттік әлеуметтік сақтандыру қорынан жалақысына байланысты ай сайынғы төлем;
– қамқорлықтағы адамдардың санына байланысты асыраушысынан айырылу жағдайы бойынша ай сайынғы мемлекеттік жәрдемақы;
– жұмыс берушінің қаражаты есебінен отбасылардың несиелерін өтеу;
– жерлеуге байланысты барлық шығындарды өтеу;
– қаза тапқандардың балалары мен жұбайларын жұмысқа орналастыру;
– 23 жасқа дейінгі балалардың оқу ақысын төлеу;
– қаза тапқандардың жұбайлары мен балаларына санаторий-курорттық емделуге жолдамалар беру;
– үйді пешпен жылытатын отбасыларға жыл сайын көмір бөлу.
Мемлекет басшысының тапсырмасына сәйкес «АрселорМиттал Теміртау» АҚ-ның қаза тапқан қызметкерлерінің отбасыларына барлық қажетті көмек көрсету мәселелері ҚР Үкіметінің ерекше бақылауында.
Еске салайық, бүгін түнде Қарағанды облысындағы Костенко атындағы шахтада өрт болды. Сағат 17.33-тегі мәлімет бойынша 33 кеншінің денесі табылды,13 адам іздестіріліп жатыр.
Кешқұрым брифинг өткізген Төтенше жағдайлар министрі Сырым Шәріпханов жер астында қалған кеншілерді тірі табуға үміт өте аз екенін мәлім етті.
Кәсіби әскерилендірілген апаттық-құтқару қызметтерінің республикалық орталық штабы Қарағанды филиалы директорының орынбасары Жұмат Өкенов мерт болған кеншілердің жеке басын анықтау қиынға түсіп жатқанын айтты.
29 қазан Жалпыұлттық аза тұту күні болып жарияланды.
Мемлекет басшысы Қасым-Жомарт Тоқаев Үкіметке «АрселорМитталТеміртау» компаниясымен инвестициялық ынтымақтастықты тоқтату туралы тапсырма берді. Кейін Үкіметтің баспасөз қызметі «АрселорМиттал Теміртау» АҚ-ның меншік құқығын ҚР меншігіне қайтару туралы келісімшарттың аяқталуға жақын екенін мәлімдеді.
