Сапар аясында партия лидері Азат Перуашев, партияның Қостанай облыстық филиалының төрағасы Махаббат Жұтаев, Мәжіліс пен жергілікті мәслихат депутаттығына кандидаттар «РудныйАвтоТранс» ЖШС мен «Аят» жеке спорт кешенінің жұмысымен танысты. Сондай-ақ, «Ақ жол» демпартиясының Қостанай облысындағы партия белсенділерімен жүздесті.
Автопарк қалалық және халықаралық жолаушы тасымалы бойынша қызмет көрсетеді. Үгіт-насихат тобына автопарк басшылығы бұл кәсіпорын тарихында Мәжіліс депутаттығына кандидаттардың бірінші рет келіп тұрғанын айтты.
«Зейнеткерлер мен мектеп оқушыларының жол ақысын субсидиялауға көмек керек және маршруттарды бөлуде жолаушылар ағынының теңгерімді үйлесімі, электронды билетті енгізуде және т.б. мәселеде қолдау қажет», — деді ЖШС директоры Сұлтанбек Ермұханов.
Азат Перуашев бұл мәселеден хабары барын, «Ақ жол» демпартиясы Жолаушылар тасымалы қауымдастығымен тікелей байланыста екенін және осындай мәселелер Теміртау, Шымкент, Ақтөбе, Астана, Атырау, Семей қалаларының автопарктерімен өткен кездесулерде көтерілгенін айтты.
Белгілі болғандай, ұжымда Тәуелсіздік алғаннан кейін тарихи отанына оралған қандас жүргізушілер де аз емес екен.
Азат Перуашев «Ақ жол» бағдарламасында қандастарды тарихи Отанына тартуды жалғастырып, оларға жан-жақты қолдау көрсету қажеттілігі көрсетілгенін тілге тиек етті.
«Ақ жол» кандидаттары ұжыммен еркін әңгімелесіп, сұрақтарға жауап берді. Жүргізушілермен әңгімеден соң кәсіпорын басшысы «Ақ жол» партиясына ризашылығын білдірді.
