Төрағасы – Азат Перуашев. Партияның Алматы облыстық филиалының басшысы – Мейраш Шынасылова.
«Ақ жол» демократиялық партиясының негізгі мақсаты – әрбір азаматтың еркін дамуы, оның құқықтары мен бостандықтарының сақталуы, барлық қазақстандықтың өмір сүру сапасы мен деңгейін ұдайы арттыру сондай-ақ, Қазақстан қоғамы мен мемлекетінің экономикалық, әлеуметтік және саяси прогресіне қол жеткізу үшін қажетті жағдайлар жасау болып табылады.
«Ақ жол» партиясы – Қазақстанда бәсекеге қабілетті және нарықтық экономика құрудың, жеке кәсіпкерлікті, ең алдымен шағын және орта бизнесті жан-жақты қолдаудың табанды жақтаушысы. Партия – мемлекеттіліктің қалыптасуының іргелі негіздерін қалаған және ұлттық мүдделерді әлемдік өркениеттің үздік жетістіктерімен ұштастыру негізінде қазақ қоғамын еуропалық жолмен жаңғыртуды мақсат етіп қойған «Алаш» ұлт-азаттық қозғалысының ізбасары. Алаш идеясын тарату тұрғысында арнайы бағдарлама әзірлеп, оны жүзеге асыру мақсатында жүйелі түрде іс-шаралар өткізіп тұрады.
«Ақ жол» партиясының әлеуметтік тірегі – қалыптасқан және дербес орта тап, оның ұйытқысы – отандық зиялы қауым және кәсіпкерлер.
«Ақ жол» демократиялық партиясының тарихи миссиясы – қоғам мен экономиканы ілгерілетудің ең өзекті міндеттерін қоюға және осы міндеттердің тиімді шешімдерін табуға қабілетті меншік иелерінің, басқарушылар мен зияткерлердің табы ретінде ұлттық бизнестің, техникалық және шығармашылық зиялы қауымның қалыптасуы мен дамуына ықпал ету.
Биылғы сайлауда облыстық мәслихатқа партиялық тізіммен 18 үміткер түсуде. Өзін-өзі ұсыну арқылы 3 кандидат облыстық мәслихатқа түсті. Аудандарға өзін-өзі ұсыну арқылы 5 үміткер тіркелді. Мәжіліске облыстан өзін-өзі ұсыну арқылы, партия мүшесі Берік Алтаев түсуде.
Облыстық филиалдың атқаратын басты міндеті – партияның саясатын өңір тұрғындарына таныстыру, туындап жатқан түрлі мәселелерді Парламент пен Үкіметке жеткізу, партияның сайлауалды бағдарламасын насихаттау, облыс тұрғындарын өтініштері бойынша партия қатарына алу. Қазіргі таңда «Ақ жол» партиясының облыс бойынша 8676 партия мүшесі бар.
