Бұл мәселелерді шешу үшін облыста 2 үрмелі бөгет салынбақ.
Тарқатып айтсақ, өңір әкімінің сөзінше, суару маусымында аудандағы 28,4 мың гектар жерді сумен қамтамасыз ету үшін Қапшағайдан Тасмұрын және Бақанас арналарына 550-650 текше метр/секунд су ағызу қажет. Яғни, Қапшағайдағы су деңгейі жазда айтарлықтай төмендейді. Бұдан бөлек, Қапшағайдан Шеңгелді суару алабы және Қонаев қаласының ауыз су қажеттіліктері үшін су алынады.
Марат Сұлтанғазиев су деңгейінің жазда төмендеп кетуінен басқа Топар каналының кебу мәселесіне тоқталып өтті.
«2022 жылы ГЭС-тен су ағызу 170 текше метр/секундына дейін төмендесе де, былтыр қажетті су көлемі жиналды. Алайда, Іле өзенінің деңгейі төмендеуінің нәтижесінде Топар каналы кеуіп кетіп, экожүйе бұзылды», — деді Марат Сұлтанғазиев.
Облыс әкімінің мәліметінше, 2015 жылы Балқаш ауданының әкімдігі Тасмұрын және Бақанас арналарын сумен қамтамасыз етуді жақсарту үшін Іле өзенінде екі үрмелі бөгет салу бойынша жоба әзірлеген. Осы жобаға түзетулер енгізіп, қайта сараптама жүргізу қажет. Бұл жұмысқа 61,4 млн теңге бөлінді.
«Тиісті басқарма мамандары, аудан әкімі суару мәселесін қысқа мерзімде шешу қажет. Себебі оның әсері тек экономикаға емес, экологияға да тиіп жатыр. Заманауи технологияларды және тиімді ауыспалы егістікті қолдану арқылы күріш алқаптарын ұлғайтуды, оның өнімділігін арттыру жөнінде шаралар қабылдауды, өңдеу зауыттарының толық жүктемесін қамтамасыз етуді тапсырамын», — деді Марат Сұлтанғазиев.
