Бұл пилоттық жобаны биыл да жалғастыру үшін Қазақстан бойынша 11 мыңнан астам микрокредит беру жоспарымен 52,4 млрд. теңге бөлінді. Оның ішінде Алматы облысына 600-ге жуық микрокредит беру жоспарымен 2,3 млрд. теңге бөлінді.
«Президенттің сайлауалды бағдарламасына сәйкес 7 жыл ішінде осы мақсаттарға 1 трлн. теңгеден астам қаржы бөлінеді. Миллионнан астам ауыл тұрғындарын қамти отырып, 350 мың жұмыс орны құрылады және кооперативтік кәсіпкерлікке барлық жеке қосалқы шаруашылықтардың жартысын тарту жоспарда бар», — деді Ербол Қарашөкеев шаруалармен өткен жиында.
Сонымен қатар министр әлеуметтік-кәсіпкерлік корпорациялар арқылы агроөнеркәсіптік кешендегі инвестициялық жобаларды қаржыландыру бағыты туралы да сөз етті.
«Аталған жобаны қаржыландырудың алдын ала сомасы шамамен 400 млрд. теңгені құрайды. Ол құс етін, сүт өндіру жөніндегі инвестициялық жобаларды іске асыруға, сондай-ақ көкөністерді өндіру үшін суару жөніндегі жобаларды және оларды сақтау жөніндегі инфрақұрылымды іске асыруға бағытталатын болады. Бұл әлеуметтік маңызы бар тауарлар бағасын тұрақтандыруға оң әсер етеді және жаңа жұмыс орындарын құру есебінен ауыл халқының табысын арттыруға мүмкіндік береді», — деді министр.
Министрдің сөзінше, бұл жобаны іске асыру бюджеттік кредиттеу есебінен жоспарланып отыр. Тиісті іс-шара «Агроөнеркәсіптік кешенді дамытудың 2030 жылға дейінгі тұжырымдамасына» өзгерістер мен толықтырулар енгізу жобасында көзделген, ол жақын арада бекітілетін болады. Тұжырымдамаға сәйкес, Алматы облысы бойынша жобалар пулы 36,8 млрд. теңге сомасына 13 жоба қолға алынбақ.
Бұдан бөлек, 2023 жылы Алматы облысында 600-ден астам жұмыс орнын құрумен 62 млрд. теңге сомасына 9 инвестициялық жобаны іске асыру жоспарланып отыр. Нақтырақ айтсақ, 58 млрд. теңге сомасына 4 жылыжай кешені, 80 млн. теңгеге 1 көкөніс қоймасы, 150 млн. теңгеге 1 бау-бақша жобасы, 2 млрд. теңгеге 1 ет өңдеу жобасы және т.б. жүзеге асырылады.
