Бұл туралы Ұлттық тестілеу орталығының директоры Руслан Емелбаев орталық коммуникациялар қызметінің брифингінде мәліметті.
«Алматы облысында талапкер ҰБТ- ға өзінің орнына басқа тұлғаны, яғни, ағасын жіберген. Тестілеуге кіргізу кезінде Face ID — жеке басын сәйкестендіру жүйесі бөгде адамды анықтады. Тиісті іс-шаралар қабылданды. Естеріңізге сала кетсем, өткен жылы осындай 18 жағдай тіркелген еді», — деді Руслан Емелбаев.
Осы орайда, биыл тестілеу алғаш рет «1 компьютер – 2 камера – 1 тестіленуші» қағидасы бойынша өткізілгенін атап өткен жөн. Аталған ереже бойынша оқуға түсушінің тест тапсыру орнында негізгі камера, түлектің дыбысын жазу және қозғалысын тіркеу үшін алдыңғы веб-камера орнатылған. Фронталды веб-камера талапкердің жеке басын сәйкестендіруге және ҰБТ кезінде бөгде адамдардың кіруіне кедергі болады.
Руслан Емелбаев ҰБТ-дан кейінгі тексерістер жайлы: «Біз барлық бейнежазбаға 31 желтоқсанға дейін талдау жасаймыз. Егер тыйым салынған заттарды пайдалану фактілері анықталса, талапкер білім беру грантынан айырылады. Ал биыл прокторинг кезінде 15 мектеп бітірушінің нәтижесі жойылды. 200-ден астам талапкердің нәтижесі әлі тексеріс үстінде», — деді.
Естеріңізде болса, бұл ереже алғаш рет 2020 жылы қолданылған еді. Нәтижесінде, 2020 жылы 152 тестіленушінің, 2021 жылы 52 талапкердің нәтижесі жойылған болатын.
