Бұл туралы «НеМолчи» қорының басшысы Дина Смайылова мәлімдеді. Оның айтуынша, ер адам ұйықтап жатқан қызды шешіндіріп, сүйе бастаған. Осы кезде қыз оянып кеткен. Полиция шақырғанымен, тәртіп сақшылары іс қозғамаған.
«Егер сүйсе, демек, денесінде сілекейі қалу керек қой. Бұл биологиялық материал емес пе? Неліктен арызды қабылдамай, қылмыс орнын тексермеген? Не үшін қызды сараптамаға жібермеді? Қорғаушыны шақырып, тергеу барысын неліктен видеоға түсірмеді? Психолог пен балалар омбудсменін неге шақырмаған? Енді дәлелдің барлығы жоғалды және педофилияға қатысты істің жартысы дәл осылай жабылып қалады», – деді Дина Смайылова.
Жазбаға қатысты пікір білдірген Алматы облысы полиция департаменті басшысының орынбасары Рустам Әбдірахманов қылмыстық істің Талғар аудандық полиция бөлімінде тіркелгенін мәлімдеді.
«9 қаңтар күні сотқа дейінгі тергеу басталды. Қылмыстық істі тергеу барысы мен қорытындысы Алматы облыстық полиция департаментінің бақылауына қойылды», – деді ол.
