«Жылыжайға әдетте осы жолмен барамын. 30 желтоқсан күні жер қатқақ болып жатқан. Өзім Қонаевтағы №10 шағын ауданда тұрамын. Арнаға айналма жолмен барғаннан гөрі төте жолмен жету тиімдірек. Уақыт та, жанармай да үнемделеді. 4 қаңтар күні таңғы уақытта сол жолмен бара жатып, көлігім суға белшеден кіріп, батпаққа тығылып қалдым», — деді Ольга Кузьмина.
Көлігінің есігі құлыпталып қалған соң Ольга терезені ашып, сыртқа шыққан. Сосын бірден облыстық Төтенше жағдайлар департаментіне хабарласқан. Ал құтқарушылар 1 сағатқа жуық уақытта келгенімен қоймай, еш көмек көрсетпестен суретке түсіріп алып, Қонаевқа қайтып кеткен.
«Құтқарушылар газельмен келді. Көлікті судан шығарып алуға да тырыспады. Керісінше, подполковник мырза маған қауіпсіздік ережелерін сақтамағаным үшін 12 АЕК көлемінде айыппұл салынатынын айтты. Таң ата қоймаған шақта алдымдағы судың терең екенін байқамадым. Арада 2 сағат өткен соң 10 мың теңге төлеп, КАМАЗ-бен көлігімді шығартып алдым. Біраз уақыттан кейін подполковник қайтадан хабарласып, ТЖД-нің айыппұл салмайтын болып шешкенін жеткізді», — деді тұрғын.
Ал облыстық ТЖД баспасөз хатшысы Гүлмира Әбілқасымова адам өміріне қауіп төніп тұрмаса, құтқарушылар көлікті судан шығарып алуға міндетті емес екенін алға тартты.
«4 қаңтар күні сағат 08.02-де теміржол маңындағы төте жолда көліктің суға батқаны туралы ТЖД-не хабар түсті. Құтқарушылар оқиға болған жерге келген уақытта көліктің ішінде ешкім болмады. Аталған жағдай ҚР ӘҚБтК-нің су айдындарында қауiпсiздiк қағидаларын бұзу немесе орындамау бабына (412-бап) сәйкес келмегендіктен, айыппұл салынған жоқ», — деді Гүлмира Әбілқасымова.
Ольга Кузьмина арнайы тас жолмен жүрмей, жоспарда белгіленбеген жолмен жүргені үшін көлікті өз қаражатына қалпына келтіреді.
Айта кетейік, оқиға болған шақтан 6 күн өтсе де, бұл жолдың бойына көліктер өтуге қауіпті екені жайлы ескерту белгілері қойылмаған.
