Әлеуметтік желіде Өзбекстанның Сырдария облысында болған жарылыс түсірілген видео пайда болды.
Өзбекстан Қорғаныс министрлігі оқиға 22 қазанда таңғы сағат 4:55-те Мәлік елдімекеніндегі (Қазақстан шекарасынан ондаған шақырым жерде) Қорғаныс министрлігі қоймасында болғанын хабарлады. Министрлік бұл қоймада не сақталғанын, сондай-ақ жарылысқа не себеп болғанын әзірге нақтылаған жоқ.
Өзбекстан Денсаулық сақтау министрлігінің Telegram-каналында хабарланғандай, жергілікті уақыт бойынша сағат 05:01-де жедел медициналық жәрдем бөлімшесіне Сырдария облысындағы Мәлік кентіндегі жарылыс туралы хабарлама келіп түскен.
Жарылыс салдарынан зардап шеккен 16 адамның 12-сі Сырдария ауданының медициналық бөліміне жеткізілген.
Төрт адам стационарлық бақылауға алынды. Зардап шеккендердің арасында ауыр жарақат алған және ауыр науқастар жоқ екендігі атап өтілді.
Іс бойынша тергеу жүріп жатыр.
