«Полиция қызметкерлері «Сырым» шекара бекеті арқылы екі ресейлікті елден шығарды. Сонымен қатар төбелеске қатысқан тағы екі ресейлік әкімшілік қамаққа алу мерзімі аяқталғаннан кейін ҚР аумағынан шығарылады», — делінген ІІМ баспасөз қызметінің хабарламасында.
Еске салайық, 30 қыркүйекте Орал қаласында түнгі клубтардың бірінің жанында ішімдік ішкен ресейлік азаматтардың арасында жаппай төбелес болды.
Жанжалға қатысы бар азаматтар полицияға жеткізілді.
Қолданыстағы заңнамаға сәйкес, құқық бұзушыларға қатысты әкімшілік құқық бұзушылық туралы кодекстің 434 (ұсақ бұзақылық), 440 (қоғамдық орындарға масаң күйде келу), 437 (тыныштықты бұзу) баптары бойынша әкімшілік хаттамалар толтырылды.
Оралдың мамандандырылған әкімшілік сотының қаулысымен Ресей Федерациясының екі азаматына ұсақ бұзақылық жасағаны үшін 5 тәулік мерзімге әкімшілік қамауға алу жазасы тағайындалды.
Қазақстан заңнамасын бұзғаны үшін сот төбелеске қатысушылардың барлығын елден шығару туралы шешім қабылдады.
