Облыс әкімінің аталған аудан тұрғындарымен кездесуі жайлы «Press Zhetysu region» телеграм каналында ақпарат тарады. Жыл соңына дейін Үшарал-Достық жолының асфальт жабынын да аяқтау жоспарланып отыр. Қазан айының соңына дейін Жетісу облысының аумағынан өтетін «Талдықорған-Қалбатау-Өскемен» тас жолының қалған 15 шақырымы асфальтталады. Көпір салу жұмыстары да аяқталады. Нысан келесі жылы пайдалануға беріледі.
«Республикалық маңызы бар осы екі трассаның ұзаққа созылған жөндеуі жергілікті тұрғындарды да, жол қозғалысына жауап беретін мамандарды да әбден шаршатты. Бұдан бөлек, бұл келеңсіздіктер туризмнің дамуына, демек, жалпы өңір экономикасы мен халықтың әл-ауқатына теріс әсер етеді», — деп атап өтті Бейбіт Исабаев.
Қазіргі таңда 18 шақырым жол ашылды. Енді қазан айының соңына дейін қалған учаскелерді асфальтпен жабу міндеті қойылды, ал абаттандыру және жобаның т.б. жұмыстары келесі жылы аяқталады.
«Қазір қозғалысты толық ашып, қолайлы қатынауды қамтамасыз ету маңызды», — деді облыс әкімі.
«Қазавтожол» АҚ облыстық филиалының мәліметінше, қалған учаскелер Алакөл, Сарқан, Ақсу және Ескелді аудандарының аумағында орналасқан.
Сондай-ақ Жансүгіров, Сағабүйен, Қабанбай және Көлбай ауылдарында 4 көпір салу жұмыстарын аяқтау қажет. Егер ауа-райы қолайлы болса, жоспарланған жұмыстардың барлық көлемі белгіленген мерзімде орындалады.
Алайда, көпірлерді қыста да сала беруге болады. Ауданда туризмді дамыту үшін кедергі келтіріп отырған жайт — Ақши және Көктума ауылдарында электр энергиясының жиі өшіп қалуы.
Осы мақсатта биыл Ақши ауылында 67 шақырымнан астам электр желілерін қайта құру және салу жобасын іске асыруға жергілікті бюджеттен 300 млн теңгеден астам қаражат бөлінді, жобаның жалпы құны – 688 млн теңге. Аяқталу мерзімі — 2023 жылдың ақпан айы.
Сондай-ақ Бескөл, Ақши ауылдарында жаңа «Ақши» қосалқы станциясы мен электр беру желілері құрылысының жобалық-сметалық құжаттамасын әзірлеуге 111 млн теңге, жалпы құны — 123,5 млн теңге бөлінді. Жұмыстарды 2023 жылдың наурыз айында аяқтау жоспарланды.
