Бахар ауылындағы әрбір үйдің жанында қоқыс жәшігі емес, үйінділер тау болып жатыр. Өлекселердің исі қолқаны қабады. Тұрғындар үйіміздің маңын жергілікті халықтың өзі бірнеше жылдан бері қоқыс алаңына айналдырып алды дейді.
«Қанша рет айттық, ешкім тазаламады. Күндіз-түні әкеліп төгіп жатыр. Әкімшілік шара қолданбағаннан кейін оларға біз не дейміз? Қоқысты тастайтын осы ауылдың тұрғындары. Учаскелік полицейлерде шара қолданбайды», — дейді Бахар ауылының тұрғыны Құрман Масай.
Ауылдың шеті емес, қақ ортасын қоқыс полигонына айналдырып жіберген жағдайдан ауыл әкімдігі хабардар болып шықты. Әкімнің міндетін уақытша атқарушы Света Әкімжанқызы ауылда қоқыс тастайтын арнайы орын бар дейді. Бірақ тұрғындар осында әкеліп төгетін көрінеді. Олар тіпті айыппұлды да ескермейді екен. Көктемде қоқыс үйінділерін тазалау үшін мердігер компанияға ақша да бөлінген. Енді тағы да қаражат қаралып, тазаланады.
Ал Шонжы ауылындағы қоқыстың жәйі тіпті нашар. Ашық даладағы қатты қалдықтар өртеніп жатыр. Төтенше жағдай мамандары тез арада тілсіз жауды ауыздықтады. Ал өртті кім қойғанын анықтау үшін шақырылған полицейлер төбе көрсетпеген. Жергілікті жұрт қоқысты ақша жинап, көлік шақырып тазалататын көрінеді.
«Күнде өзіміз тазалаймыз. Ауыл әкімдігіне айтып шаршадық. Нәтиже жоқ. Әр пәтер 500-1000 теңгеден шығарып, камаз жалдап шығарамыз қоқысты», — дейді Шонжы ауылының тұрғыны Гүлназ Тохтанхунова.
Шонжы ауылының шет жағындағы көрініс тіпті жаға ұстатады. Қоқыс тастауға рұқсат етілмеген белгі тайға таңба басқандай жазылғанымен, ешкім ескермегені байқалады. Қатты қалдықтармен қоса, мал өлекселерінен көз сүрінеді. Әкімдік мамандары полигондар толып қала бергендіктен, осылай болады дейді. Қоқысты темір өткізетіндер өртейтінін де айтып қалды. Бірақ әдеттегідей ақша бөліп мәселені шешеміз деп құтылды.
