Осыдан бірнеше апта бұрын мұнда тіршілік қайнаған еді. Жан-жақтан шыққан музыка, кәуап пен тәтті мақтаның иісі мұрын жаратын. Бүгінгі жағажайдың келбетіне қарасақ, мұның бәрі болмағандай сезім тудырады.
Туристердің көлге шомылуға келгеніне бір ғана дәлел бар. Ол — қараусыз қалған тапшандар мен қоқыстың үйінділері. Демалушылар саябырсығаннан кейін, көл мен оның экожүйесі ендігі маусымға дейін ешкімге керексіз болып қалады деуге болады. Шашылған пластик бөтелкелер, шөлмектер, темекі тұқылы, әйнек сынықтары — бәрі де сөзіміздің дәлелі.
Қыркүйекте суға шомылуға бола ма?
Аталған айда су жағадан бірнеше метр артқа кеткені байқалады. Тұрғындардың айтуынша, Қапшағай су қоймасы үшін бұл жағдай қалыпты. Көл бірде толып, бірде шегініп тұрады.
Күздің бірінші айында көлге түсетіндер бар. Десе де, жазға аяқ басатын мамыр айындағыдай, су салқын — 18-20 °C шамасында.
Мамандар мен зерттеушілердің сөзіне қарағанда, Қапшағайдың болашағы жарқын. Бір жаздың өзінде бұл жерге 1 млн-ға жуық демалушылар келеді, 100-ден астам демалыс орындары, қонақ үйлер жұмыс жасайды. Және бұл сандар Қапшағайдың толық қауқарын ашық көрсете алмайды. Егер биліктегілердің инфрақұрылымды дамыту мен абаттандыру мақсатындағы жоспары жүзеге асса, Қапшағай курортының жаңа дәуірі басталады.
Анықтама:
Қапшағай су қоймасы — Қазақстандағы ірі су қоймалардың бірі. Оның ұзындығы — 180 км, ені — 22 км. Бүгінде жазғы маусымда Алматы облысындағы демалушылар ең көп келетін жер де — осы. 1965-1980 жылдар аралығында су қоймасы мен Қапшағай ГЭС-і бой көтерді. Ал 1970 жылы су толтырыла бастады.
