Ресми мәліметке сүйенсек, Мемлекет басшысының Жолдауында айтылған шараларды іске асыру мақсатында базалық зейнетақы мөлшерін арттыру және ынтымақты зейнетақыны есептеу үшін ең жоғары табысты ұлғайту көзделеді. Бұған дейін қабылданған шешімдермен бірге бұл 2025 жылға қарай жиынтық зейнетақыны орта есеппен 27% ұлғайтуға мүмкіндік береді.
«Бүгінгі таңда өзгерістер нәтижесінде Қазақстанда базалық және ынтымақты зейнетақыны, сондай-ақ БЖЗҚ-дан төленетін зейнетақы төлемін қамтитын көп деңгейлі зейнетақы жүйесі қалыптасты», — делінген министрліктің хабарламасында.
Сондай-ақ ақпаратта ынтымақты зейнетақы жүйесі біртіндеп қысқаратыны жайлы жазылған. Өйткені оларды тағайындау кезінде 1998 жылғы 1 қаңтарға дейін, яғни жинақтаушы жүйесі енгізілгенге дейінгі еңбек өтілі ескеріледі.
Министрлік Әлеуметтік кодекс жобасы шеңберінде мынадай өзгерістер енгізуді ұсынды:
- 2023-2027 жж кезеңде ең төменгі базалық зейнетақының мөлшерін кезең-кезеңімен ең төменгі күнкөріс деңгейінің шамасынан 54-тен 70% дейін, ең жоғары мөлшерін 100-ден 120% дейін жеткізу;
Осы кезеңде базалық зейнетақы мөлшері орта есеппен 51%-ға дейін арттырылатын болады. Бұл ретте базалық зейнетақының орташа мөлшерінің жыл сайынғы өсуі шамамен 13% құрайды және барлық 2 млн зейнеткерге қатысты.
- 2023 ж 1 қаңтардан бастап зейнетке шығатын азаматтар үшін ынтымақты зейнетақыларды есептеу үшін пайдаланылатын ең жоғары табыстың шамасын 46-дан 55 айлық есептік көрсеткішке дейін арттыру.
