5 қарашада онлайн форматта өткен есеп беру-сайлау конференциясына Қазақстан ұлттық спорттық ату федерациясының президенті Берік Асылов, бас хатшысы Олег Почивалов және спорт қауымдастығының өкілдері қатысты.
Жиында Алматы облысында нысана көздеп ату және стендтік ату спортын дамыту, спорттық инфрақұрылымды жетілдіру, сондай-ақ жас спортшыларды даярлау мәселелері талқыланды.
Федерацияның өңірлік филиалына президент болып сайланған Шыңғыс Әрінов Александр Асанов атындағы спорт клубына барып, оның материалдық-техникалық базасымен танысты. Сондай-ақ спортшылардың жаттығу жағдайын, кәсіби даярлық деңгейін арттыруға арналған мүмкіндіктерді қарастырды.
Кездесу барысында клубтың инфрақұрылымын одан әрі дамыту, спорттық ату үйірмелерінің қолжетімділігін арттыру және балалар мен жасөспірімдерді спортқа тарту мәселелеріне ерекше назар аударылды.
Алдағы уақытта федерацияның өңірлік филиалы Алматы облысында спорттық атуды кеңінен насихаттауға, жас таланттарды анықтауға және кәсіби спортшылар даярлауға басымдық бермек. Сонымен қатар өңірдің спорттық резервін қалыптастыру және спортшыларға қолайлы жағдай жасау бағытындағы жұмыстар жалғасады.
