Боралдай кентінде бой көтерген жаңа мәдениет үйі тұрғындардың мәдени өмірін жандандырып, балалар мен жастардың шығармашылық қабілетін дамытуға арналған. Мұнда концерттер, түрлі мәдени-көпшілік іс-шаралар өткізуге және шығармашылық ұжымдардың тұрақты жұмыс істеуіне жағдай жасау көзделген.
Нысанның құрылысы 2023 жылы басталған. Жобаның тапсырыс берушісі – Іле ауданының құрылыс бөлімі, ал бас мердігері – «BEREKET-TK» ЖШС. Құрылыс жұмыстарына жасалған келісімшарттың жалпы құны 796,4 миллион теңге.
Алайда жобаны жүзеге асыру барысында бірқатар қаржылық қиындықтар туындаған. Атап айтқанда, 2021 жылы әзірленген жобалау-сметалық құжаттама құрылыс материалдары бағасының қымбаттауына байланысты қайта қаралған.
2026 жылғы 4 мамырда түзетілген жоба мемлекеттік сараптаманың оң қорытындысын алған. Құжатта жобаның қымбаттау сомасы 862,8 миллион теңге деп көрсетілген.
Алматы облыстық бюджет комиссиясы бұған дейін жоба құнының 20 пайыздан аспайтын мөлшерде өсуін мақұлдаған. Осыған байланысты Іле ауданының құрылыс бөлімі биыл 20 мамырда облыстық құрылыс басқармасына қосымша қаржыландыру жөнінде бюджеттік өтінім жолдаған. Қазіргі уақытта өтінім қаралу үстінде.
Ресми ақпаратқа сәйкес, мәдениет үйінің құрылыс-монтаж жұмыстары толығымен аяқталған. Дегенмен ғимаратты пайдалануға беру үшін ішкі жабдықтарды орнатып, материалдық-техникалық базасын жасақтау қажет.
Жаңа мәдениет үйінің ашылуы Боралдай тұрғындары үшін маңызды әлеуметтік-мәдени оқиға болмақ. Нысан іске қосылған жағдайда жергілікті өнер ұжымдарының жұмысына, балалар мен жасөспірімдердің шығармашылық үйірмелерге қатысуына және тұрғындардың мәдени демалысын ұйымдастыруға қосымша мүмкіндік туады.
Қазіргі жоспар бойынша мәдениет үйін 2026 жылдың соңына дейін пайдалануға беру көзделген. Алайда бұл үшін қосымша қаржыландыру мәселесі шешілуі тиіс.
