Сарапшының айтуынша, білім саласына салынған инвестицияны елдің ұзақ мерзімді дамуына бағытталған инвестиция деп қарастырған жөн. Өйткені мемлекеттің экономикалық және әлеуметтік әлеуеті ең алдымен сапалы білім алған, білікті әрі бәсекеге қабілетті мамандарға байланысты.
«Мемлекет басшысының Ұстаздар күні қарсаңында айтқан бастамалары білім беру саласын дамытуға бағытталған жүйелі саясаттың жалғасып жатқанын көрсетеді. Әсіресе ұстаз мәртебесін арттыру, жаңа мектептер салу, жас мамандарды қолдау және жасанды интеллектіні білім беру үдерісіне енгізу мәселелері саланың сапалы дамуына негіз болады», – деді Еркежан Мырзабекқызы.
Оның пікірінше, қазіргі кезеңде білім беру жүйесінің міндеті тек оқушыға академиялық білім берумен шектелмеуі керек. Цифрлық технологиялардың қарқынды дамуы оқыту тәсілдерін жаңартып, педагогтердің кәсіби құзыретін үнемі жетілдіруді талап етеді. Бұл ретте жасанды интеллект мұғалімді алмастыратын құрал емес, оның жұмысын жеңілдетіп, білім беру сапасын арттыруға мүмкіндік беретін технология ретінде қарастырылуы тиіс.
Сарапшы Президенттің адами капиталды дамытуға ерекше назар аударуын стратегиялық тұрғыдан маңызды деп бағалады.
«Елдің бәсекеге қабілеттілігі ең алдымен білімді ұрпақ пен кәсіби мамандарға байланысты. Сондықтан ұстаздарды қолдау, олардың қоғамдағы беделін көтеру және жастардың сапалы білім алуына жағдай жасау – мемлекеттің болашағына жасалған инвестиция», – деді ол.
Сарапшының сөзінше, білім беру инфрақұрылымын жаңарту, педагогтерді қолдау мен заманауи технологияларды оқу үдерісіне тиімді енгізу өзара сабақтас жүзеге асқанда ғана нақты нәтиже береді. Ал бұл бағыттағы жүйелі жұмыс еліміздің адами капиталын нығайтып, жаңа буынның заман талабына сай білім алуына мүмкіндік береді.
