Алматы облысының Жастар ресурстық орталығы ұйымдастырған жарыстың негізгі мақсаты – жастар арасында салауатты өмір салтын насихаттау, бұқаралық спортқа қызығушылықты арттыру және стрит-воркаут бағытындағы мықты спортшыларды анықтау.
Сайыс бірнеше кезең бойынша өтті. Біліктілік кезеңінде қатысушылар 20 рет тартылып, брусьяда 35 рет қолды бүгіп-жазудан уақытқа сынға түсті. Үздік нәтиже көрсеткен 16 спортшы жарыстың келесі кезеңіне жолдама алды.
Ширек финалда спортшылар максималды тартылу және брусьяда қолды бүгіп-жазудан өзара мықтыны анықтады. Жартылай финалда қатысушылардың физикалық дайындығы мен төзімділігі сыналса, шешуші кезең «Speed Workout Duel» форматында өтті. Гранд-финалға шыққан төрт спортшы екі жұпқа бөлініп, жүлделі орындар үшін бәсекеге түсті.
Жарыс жеңімпаздары ақшалай және бағалы сыйлықтармен марапатталды. Бірінші орын иегеріне 250 мың, екінші орынға 150 мың, үшінші орынға 100 мың теңге табысталды.
Айта кетейік, Алматы облысында 14 пен 35 жас аралығындағы 432 мыңнан астам жас тұрады. Олардың басым бөлігі – ауылдық елді мекендердің тұрғындары. Сондықтан жастарды бұқаралық спортқа тарту және өңірлерде белсенді өмір салтын қалыптастыру облыстағы жастар саясатының маңызды бағыттарының бірі саналады.
Ұйымдастырушылар «Workout Strong» секілді жарыстар жастардың спортқа қызығушылығын арттырып, өз мүмкіндігін сынауына және салауатты өмір салтын күнделікті дағдыға айналдыруына ықпал ететінін атап өтті.
