«Адамдар көп жағдайда қабылданған маңызды шешімдердің шынайы құндылығын жылдар өткен соң ғана түсінеді. Алдағы жексенбі ел тағдыры үшін дәл осындай бетбұрысты сәт болады», – деді Тоқаев.
Президенттің айтуынша, сайлауалды науқан ашық әрі бәсекелі форматта өткен. Партиялар өз бағдарламаларын сайлаушылармен кездесулерде, теледебаттарда, ақпарат құралдары мен әлеуметтік желілерде таныстырған.
«Бір сөзбен, азаматтарымыз партиялардың ел болашағына қатысты ұстанымын мұқият зерделеуге мүмкіндік алды», – деді ол.
Тоқаев Құрылтай құрамына кәсіби мамандар мен отаншыл азаматтар сайланады деген сенім білдірді. Оның пікірінше, жаңа орган түрлі көзқарастар тоғысатын және елдің жаңғыруына серпін беретін біртұтас алаңға айналуы тиіс.
Мемлекет басшысы алдағы дауыс беруде әр азаматтың таңдауы маңызды екенін атап өтті.
«Біз Қазақстан тарихындағы жаңа кезеңге қадам басамыз. Осындай тағдыршешті сәтте әр адамның дауысы маңызды екені сөзсіз», – деді Президент.
