Айдын Оразбаевтың айтуынша, «Сайлау туралы» заңға сәйкес, сайлау күні құқық қорғау органдары үшін жұмыс күні саналады. Осыған байланысты жеке құрам күшейтілген режимде қызмет атқарады.
Қоғамдық қауіпсіздікті қамтамасыз ету мақсатында әкімдіктермен және басқа да мемлекеттік органдармен бірлескен арнайы штабтар құрылған. Олар сайлау күні қоғамдық тәртіпті сақтау жұмыстарын үйлестіреді.
Сонымен қатар көшелер мен қоғамдық орындардағы жағдай сыртқы бейнебақылау камералары арқылы тәулік бойы бақыланады.
«Қоғамдық тәртіпті қамтамасыз етуге полиция қызметкерлері мен Ұлттық ұлан әскери қызметшілерінің барынша көп саны жұмылдырылады. Соның ішінде сайлау өтетін барлық учаске күзетіледі», – деді Айдын Оразбаев.
ІІМ өкілі сайлау күні әлеуметтік желілердегі жағдайға да назар аударылатынын жеткізді. Ведомство жалған ақпарат немесе арандатушылық сипаттағы контент таратқан азаматтардың заңнамаға сәйкес жауапкершілікке тартылатынын ескертті.
