Прокуратура әзірлеген цифрлық жүйе жасанды интеллект пен үлкен деректерді (Big Data) талдау технологияларын пайдалана отырып, мемлекеттік ақпараттық базалардағы мәліметтерді автоматты түрде өңдейді. Нәтижесінде көші-қон саласындағы ықтимал заң бұзушылықтар ерте кезеңде анықталады.
Жүйенің көмегімен 159 мыңнан астам шетел азаматы туралы дерек пен 30 мыңнан астам әкімшілік материал сараптамадан өткізілген.
Талдау нәтижесінде 287 әкімшілік құқық бұзушылықтың дұрыс сараланбағаны, жұмыс берушілерге қатысты заңда көзделген шаралардың қолданылмауының 61 фактісі, шетелдік жұмыс күшін заңсыз пайдаланудың 11 дерегі, сондай-ақ елден шығару туралы сот шешімдерінің орындалмаған 12 жағдайы және өзге де заң бұзушылықтар анықталған.
Үйлестіру кеңесінің қорытындысында Алматы облысының прокуроры Берік Адамов цифрлық технологияларды құқық қорғау қызметіне енгізу көші-қон саласындағы заңсыздықтарды дер кезінде анықтап қана қоймай, олардың алдын алу тиімділігін арттыратынын атап өтті.
Мамандардың айтуынша, «Dala-Cloud» жүйесі мемлекеттік органдардың өзара іс-қимылын күшейтіп, көші-қон процестерін бақылаудың ашықтығы мен тиімділігін арттыруға мүмкіндік береді. Сонымен қатар жасанды интеллект технологияларын пайдалану адами фактордың ықпалын азайтып, заңнаманың сақталуын қамтамасыз етуге бағытталған жаңа цифрлық тетіктердің бірі саналады.
